Memlekettik-jekeshelik áriptestik jobalarynyń quny 3,5 trln teńgege jetti

NUR-SULTAN. QazAqparat – QR Ulttyq ekonomıka mınıstri Rýslan Dálenov memlekettik-jekeshelik áriptestik jobalarynyń negizgi bóligi bilim berý jáne densaýlyq saqtaý salalaryna tıesili ekenin aıtty, dep habarlaıdy QazAqparat tilshisi.

«1 qazandaǵy jaǵdaı boıynsha memlekettik-jekeshelik áriptestik jobalarynyń jalpy sany 1253 boldy jáne olardyń quny 3,5 trln teńge kóleminde. Onyń ishinde 1,6 trln teńgege 615 shart jasaldy, sondaı-aq 1,9 trln teńgege 638 joba daıyndaý satysynda», - dedi mınıstr Úkimet otyrysynda.

Onyń sózine qaraǵanda, salalar bólinisinde jobalardyń eń kóp bóligi bilim berý jáne densaýlyq saqtaý baǵyttaryna tıesili. Odan keıingi orynda mádenıet, sport, energetıka jáne turǵyn úı-kommýnaldyq salalarynda MJÁ jobalary iske asyrylýda.

«Qomaqty kapıtaldy qajet etetin jobalar kólik jáne ınfraqurylym, energetıka jáne túrǵyn úı-kommýnaldyq salalarynda», - dedi vedomstvo basshysy.

R. Dálenovtiń atap ótýinshe, memlekettik-jekeshelik áriptestikti ary qaraı jetildirý úshin barlyq rásimderdi elektrondy formatqa aýystyrý usynylýda. Protsesti tsıfrlandyrý maqsatynda josparlaý, tenderlik rásimderdi, qorytyndyny, tirkeýdi, shartty oryndaýdy elektrondy tártiptike kóshirý kózdelgen. Bul jumystardy memlekettik satyp alý portalymen ıntegratsııalaý josparlanýda.

Aıta keteıik, búgin QR Úkimet basshysy Asqar Mamın memlekettik-jekeshelik áriptestikti damytýǵa qatysty tapsyrmalar júktedi.