Memlekettik-jekeshelik áriptestik sharttary artty - QR UEM

ASTANA. QazAqparat - Memlekettik-jekeshelik áriptestik boıynsha óńirlerdiń belsendiligi artty. Bul týraly Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Búgingi kúni jalpy somasy 139,5 mlrd teńgege 116 shart jasaldy. Mamyrda men baıandama jasaǵanda 46 shart jasalǵan bolatyn, 2,5 ese deńgeıinde ósim boldy», - dep atap ótti mınıstr.

Vedomstvo málimetine qaraǵanda, bıylǵy 10 aı ishinde 70 mlrd teńge somasyna 88 shart jasaldy. Mamyrdan qazanǵa deıingi kezeńde 59,5 mlrd teńge somasyna 70 shart jasaldy. 70 mlrd. teńge somasyn quraıtyn 53 nysan paıdalanýǵa berildi. Qurylys satysynda 69,5 mlrd teńge somasyndaǵy 63 nysan bar.

Qosymsha, memlekettik organdardyń esepterine sáıkes ártúrli daıyndyq satylarynda jalpy somasy 1,7 trln. teńgeni quraıtyn 431 joba tur. Olardyń qatarynda respýblıkalyq deńgeıde 15 joba pysyqtalýda (906,5 mlrd teńge). Jergilikti deńgeıde 760,6 mlrd. teńgege 416 óńirlik joba daıyndalýda.

«Óńirlerdiń belsendiligin myna kórinisten baıqaýǵa bolady. Júrgizilgen ortalyqsyzdandyrý jáne ákimdikterge MJÁ jobalaryn óz betinshe daıyndaý jáne qaraý ókilettigin berý jalpy MJÁ-ni jandandyrdy. Joǵaryda atalǵan sharttardyń (116) negizgisi óńirlerdiń úlesine keledi. Óńirlerde barlyǵy 93,3 mlrd. teńge somaǵa 113 MJÁ sharty jasaldy. Qosymsha, Shyǵys Qazaqstan oblysynyń 64 MJÁ sharttary (kishi balabaqshalar boıynsha) qazynashylyq organdarda tirkeý satysynda. Shart jasasý boıynsha kóshbasshy Qaraǵandy (21), Qostanaı (17), jáne Ońtústik Qazaqstan oblystary (13) bolyp tabylady. Bul rette, ınvestıtsııa kólemi boıynsha (jobanyń quny boıynsha) Aqtóbe oblysy (16,6 mlrd. teńge) jáne Astana qalasy (15,1 mlrd. teńge) kósh bastap tur. Keıbir oblystar boıynsha ázirge «tómen» kórsetkishter baıqalýda. Olarda daıyndyq ústindegi jobalar bar, sol boıynsha jumysty jedeldetý qajet»,- dedi T. Súleımenov.