Memlekettik tildiń halyqaralyq órisin ashatyn «National Geographic Qazaqstan» sekildi jobalardy qoldaý kerek - D. Abaev (FOTO)
Sóz arasynda Aqparat jáne kommýnıkatsııalar mınıstri D. Abaev «National Geographic Qazaqstan» jýrnalynyń shyǵýyna Elbasy N. Nazarbaevtyń ózi aıryqsha nazar aýdarǵanyn, basylymnyń alǵashqy nómirine arnap aq tilegin arnaǵanyn atap ótti. Mınıstrdiń aıtýynsha, álemdik jýrnaldyń Ortalyq Azııada alǵash ret qazaq tilinde shyǵýyna Qazaqstannyń bastamashylyq etýi de zańdylyq. Óıtkeni, mınıstrdiń aıtýynsha, Qazaqstannyń jahan jurtshylyqtaryna usynýǵa laıyqty qundylyqtary men asyl jaýharlary óte mol.
«Adamzat órkenıetiniń damýyna orasan úles qosqan, zamanynda álemniń saıası geografııasyna yqpal etken, memleketterdiń shejiresi Qazaqstanmen sabaqtasyp jatyr. Tasyn túrtse tarıhy sóıleıtin, Altaı men Kaspıı arasyndaǵy talaıdy tamsandyratyn tabıǵaty, máıekti mádenıeti men qaıtalanbas salt-dástúri «National Geographic» úshin taýsylmas taqyryp bolatynyna kúmán joq. Keshegi Abaıdaı dananyń marjan oılaryn urpaqtan-urpaqqa jetkizgen qazaq tiliniń kórkemdigin, sarqylmas baılyǵyn tanytatyn da osy tus dep oılaımyn. Til - jandy dúnıe. Onyń damýy, qoldanys aýqymynyń ulǵaıýy qaýly qararǵa, bólinetin qarjyǵa ǵana tirelip turǵan joq.
Daýryqpa urandardyń da is júzinde paıdasy shamaly. Bizdiń memlekettik tildiń órisin ashatyn, onyń qarym-qabiletine ózimizdi ǵana emes, ózgeni de sendire alatyn osyndaı sapaly jobalar qajet. Biz osyndaı jobalardy tolyqtaı qoldaýǵa ázirmiz. Álemdik brendti elimizge ákelgen, ony joǵary sapa standarttaryn saqtaı otyryp, qazaq tilinde shyǵaryp jatqan azamattarǵa rızashylyǵymyzdy bildirgim keledi», - dedi D. Abaev.
«National Geographic Qazaqstan» jýrnaly otandyq basylymdar úshin aqparattyq ónimniń ozyq úlgisi bolady dep senemin. Sondyqtan da búgin tusaýy kesilip jatqan jańa basylymǵa tabys tileımin. Aqparat aıdynyndaǵy qadamdaryńyzǵa sáttilik tileımin», - dedi mınıstr D. Abaev.
Eske sala keteıik, «National Geographic Qazaqstan» jýrnalynyń tusaýkeser rásimi aıasynda Astanadaǵy Ulttyq mýzeıde «National Geographic-tiń» úzdik 50 sýreti» atty fotokórme óz jumysyn bastady.