Memlekettik tildi damytý qory balalarǵa arnalǵan birqatar jobalardy iske qosady - Azat Sháýeev

ASTANA. QazAqparat - Bıyl Memlekettik tildi damytý qory jańa tehnologııalar negizinde birqatar jobalardy iske asyrady. Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan qordyń dırektory Azat Sháýeev málim etti.

«Memlekettik tildi damytý qory bir ǵana portalmen shektelip qalmaıdy. Túrli jobalarymyzdy josparlap otyrmyz. Byltyrǵy jyldyń aıaǵynda "Aıtys" (iTys) atty tuńǵysh qazaqstandyq messendjerdiń tanystyrylymy ótken bolatyn. Búginde ony 300 myńnan astam jastar paıdalanýda. Sondaı-aq qarjy tabylǵan jaǵdaıda, jyldyń sońyna deıin «Qujat tili» úlken portayn ázirlemekpiz»,-dedi Sháýeev.

Bıylǵy naýryzda Elbasynyń qabyldaýynda bolǵanyn eske salyp ótken ol, Prezıdent balalarǵa arnalǵan jobalardy iske qosýǵa tapsyrma bergendigin atap ótti.

«Astana kúni qarsańynda «Tátti alma» atty balalarǵa arnalǵan jobany iske asyrmaqpyz. Táýelsizdik jyldary qazaqstandyq aqyndar men jazýshylardyń esh jerde jarııalanbaǵan balalarǵa arnap jazǵan shyǵarmalaryn qamtı otyryp, eki tomdyq antologııany jasap shyǵarmaqpyz. Sonymen qatar «Tatti alma.kz» atty tek balalar úshin ádebı portal qurmaqshymyz», - dedi qor dırektory.

Onyń aıtýynsha, Uly aqyn Abaıdyń 170 jyldyǵyna oraı Memlekettik tildi damytý qory «Abay alemi.kz» atty úlken portaldy ashýdy josparlanyp otyr.

«Elbasynyń tapsyrmasyna sáıkes, balalar men jastarǵa arnalǵan taǵy da jańa jobalardy aldaǵy ýaqytta tanystyramyz dep josparladyq» , -dedi Azat Sháýeev.

Aıta keteıik, búgin Astanada Memlekettik tildi damytý qory men «Samsung Electronics Central Eurasia» kompanııasy birlesip SMART.TV úshin arnaıy ázirlegen «Soyle.kz» qosymshasynyń tusaýkeseri ótti.

Bul qosymshanyń ázirlenýi qazaq tiliniń álemdik aqparattyq júıege enýine yqpal etpek. Endi «Soyle.kz» qosymshasynyń kómegimen úıde teledıdar aldynda otyryp-aq SMART.TV arqyly qazaq tilin úırenýge bolady.