Memlekettik sot oryndaýshylar sanyn qysqartýdan 1,8 mlrd teńge únemdeldi

ASTANA. QazAqparat - Memlekettik sot oryndaýshylary sanyn qysqartý esebinen el bıýdjeti 1,8 mlrd  teńgege únemdeldi. Bul týraly búgin Úkimet úıinde «100 naqty qadam» Ult josparynyń iske asyrylý barysyna arnalǵan baspasóz máslıhatynda Ádilet mınıstriniń orynbasary Janat Eshmaǵambetov málim etti, dep habarlaıdy QazAqparat.

«2016 jyldan bastap memlekettik sot oryndaýshylarynda memlekettiń múddesin qorǵaıtyn qujattar ǵana qaldy. Barlyq basqa sanattar jeke oryndaýshylardyń quzyretine berildi. Bul olardyń quqyqtary men mindetterin aıtarlyqtaı keńeıtti.  Mysaly, olarǵa jeke tulǵalardyń bankterdegi shottary týraly aqparatty suratý týraly ókilettilik berildi. Kómekshilerge protsessýaldy is-áreketter shyǵarýmen baılanysty emes fýnktsııalar bóligi berildi. Sondaı-aq, Respýblıkalyq jeke sot oryndaýshylary palatasynyń negizinde biliktiligin  merzimdi túrde arttyrý talaby bekitildi»,-  dedi ol.

Onyń aıtýynsha, 2015 jyldyń sońynda elimizde shamamen 1 000 jeke sot oryndaýshysy  jumys istese, qazir olardyń jalpy sany 1 498 quraıdy. Osy saladaǵy kómekshiler men is júrgizýshilerdi qosa eseptegende, shamamen 4 000 jumys orny ashyldy. Instıtýt engizilgennen keıin, jalpy  4 784 lıtsenzııa berildi.

«27-qadamnyń ekinshi baǵytyn iske asyrý maqsatynda 2016 jyly memlekettik sot oryndaýshylary 30 paıyzǵa qysqartyldy. Aǵymdaǵy jyly da dál sonsha memlekettik qyzmetkerlerdi qysqartý kózdelgen. 2018 jyly 15 paıyz qysqarady. Nátıjesinde barlyǵy 303 memlekettik sot oryndaýshysy qalady.  Sol sebepti jyl saıyn bıýdjettik qarajatty únemdeý shamamen 1,8 mlrd teńgeni quraıdy», - dedi ol.

Eshmaǵambetovtiń dereginshe, atalǵan sharalardy qabyldaý jeke sot oryndaýshylary  óndirisindegi qujattar sanynyń eki ese kóbeıýine ákeldi. 2015 jyly - 936 myń, 2016 jyly - 2 mln astam.  Oryndalǵan qujattardyń sany ǵana emes, somasy da 249 myńnan 588 myńǵa deıin jáne 58 mlrd teńgeden 96 mlrd teńgege deıin artty.