Memlekettik sektordyń ekonomıkadaǵy úlesin tómendetý – strategııalyq mindet – Máýlen Áshimbaev

NUR-SULTAN. QazAqparat – Senattyń jalpy otyrysynda Palata tóraǵasy Máýlen Áshimbaev kvazımemlekettik sektordyń tıimdiligin arttyrý máselesinde jekeshelendirýdiń mańyzy zor ekenin aıtty, dep habarlaıdy QazAqparat tilshisi.

«Qazir júrgizilip jatqan jekeshelendirý jumystaryn ári qaraı da qarqyndy túrde jalǵastyrý qajet. Kvazımemlekettik sektordyń biraz fýnktsııalaryn básekeli ortaǵa berý kerek. Eń bastysy, jekeshelendirýge qatysty barlyq jumysty ashyq ári ádil júrgizgen jón», – dedi Máýlen Áshimbaev.

Sondaı-aq ol jalpy el ekonomıkasyn damytý úshin memlekettik sektordyń ondaǵy úlesin tómendetý negizgi qadam ekenine nazar aýdardy.

«Búginde memlekettik sektordyń ekonomıkadaǵy úlesi kem degende 40 paıyzdy quraıdy. Osy kórsetkishti Ekonomıkalyq yntymaqtastyq jáne damý uıymyna múshe elderdiń ortasha deńgeıine deıin tómendetýimiz kerek. Bul – bizdiń strategııalyq mindetimiz. Sondyqtan osy baǵyttaǵy jumysty tabandy ári júıeli túrde júrgizýimiz qajet», – dedi Senat spıkeri.

Aıta keteıik, búgin Palata otyrysynda senatorlar Úkimettiń jáne Esep komıtetiniń 2021 jylǵy respýblıkalyq bıýdjettiń atqarylýy týraly esepterin tyńdady.

Budan buryn habarlanǵandaı, E.Jamaýbaev jalpy sıpattaǵy transfertterdi kóbirek alý úshin jergilikti jerlerde salyq bazasyn kemitip kórsetý faktilerine qatysty Esep komıtetiniń eskertýi oryndy ekenin aıtty.

Sonymen qatar ol memleket boryshy qaýipsiz deńgeıde saqtalyp turǵanyn atap ótti.