Memlekettik satyp alýlar boıynsha bas merdigerlerge qatysty 31 qylmystyq qozǵaldy

ASTANA. QazAqparat - Salyqtan jaltarý faktisimen memlekettik satyp alýlar boıynsha bas merdigerlerge qatysty 31 qylmystyq is qozǵaldy. Bul týraly búgin QR Qarjy mınıstrligine qarasty Memlekettik kirister komıteti aýdıt basqarmasynyń basshysy Serik Aısın málim etti.

«Sotqa deıingi tekserýdiń biryńǵaı tizilimine jalǵan kásipkerlik pen salyq tóleýden jaltarý boıynsha 563 qylmystyq is tirkelgen. Onyń ishinde memlekettik satyp alýlar boıynsha bas merdigerlerge qatysty 31 qylmystyq is te bar», - dedi ol.
Sonymen qatar, onyń atap ótýinshe, túrli deńgeıde senimsiz kontragenttermen ózara tólem júrgizgen birqatar salyq tóleýshiniń salyq tóleýden jaltarýy múmkin degen de kúdik bar.
Senimsiz salyq tóleýshilermen ózara jasalǵan tólemniń somasy 270 mlrd. teńgeden asyp shyǵylady. Al boljamdy salyq kólemi shamamen 75 mlrd. teńgeni quraıdy.
Jalpy, 8 baǵyt boıynsha 434 salyq tóleýshi zerdelengen. Olardyń qatarynda memlekettik satyp alýlar, «Nurly jol» memlekettik baǵdarlamasy, «Óńirlerdi damytý - 2020» baǵdarlamasy boıynsha da bar. Búginde 111 salyq tóleýshige qatysty is qarastyrylýda.
«Búgingi kúni júrgizilgen jumystyń birinshi kezeńiniń nátıjesi boıynsha jalpy somasy 20,2 mlrd. teńge qosymsha salyqtyq eseptilik berildi jáne bıýdjetke 16,4 mlrd. teńge óndirilip alyndy», - dedi ol.