Memlekettik satyp alýda baǵany negizsiz kótergen sheneýnikterdi jazalaý usynyldy

NUR-SULTAN. QazAqparat – Memlekettik satyp alýda negizsiz qymbat baǵalarǵa tekserý júrgizilip, 5 mlrd teńge únemdeldi. Bul týraly QR Sybaılas jemqorlyqqa qarsy is-qımyl agenttigi tóraǵasynyń orynbasary Ulan Sarqulov aıtty, dep habarlaıdy QazAqparat tilshisi.

«Sybaılas jemqorlyqtyń taǵy bir mańyzdy faktory – memlekettik satyp alýdy josparlaý kezinde baǵanyń negizsiz qymbat bolýy. Bul aqsha aldyn ala para úshin de, jaqsy paıda tabý úshin de eseptelip jazylady. Agenttik «Atameken» ulttyq palatasymen birlesip júıeli negizde qymbat baǵalarǵa monıtorıng júrgizip jatyr. Jyl basynan beri bizdiń usynystarymyzben memlekettik organdar óz satyp alýlaryn qaıta qarap, bıýdjetten 5 mlrd teńgege jýyq qarjy únemdedi», - dedi U. Sarqulov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, 2 jyl ishinde shamamen 74 mlrd teńge únemdelgen.

«Osyndaı baǵany kóterý kezinde laýazymdy tulǵalarǵa esh jaýapkershilik artylmaıtyny anyqtaldy. Biz Qarjy mınıstrligine uqypsyz sheneýnikterdi ákimshilik tártipte jazalaýdy usynyp, usynystar engizdik», - dedi Ulan Sarqulov.

Sonymen birge, sybaılas jemqorlyqtyń taǵy bir sebebi – keıbir satyp alý rásimderiniń jabyq bolýy.

«Tapsyrys berýshi «aqparatty shektep taratý» belgisimen satyp alýdy jabady jáne is júzinde ony sybaılas jemqorlyq aýmaǵyna engizedi. Mundaı satyp alý tek qaǵaz júzinde ǵana iske asady jáne qoǵamdyq baqylaýdan tys qalady. Nátıjesinde bul satyp alýǵa úlestes kompanııalar qatysady, baǵalar negizsiz kóteriledi jáne qajetsiz jumystar men qyzmetter satyp alynady. Mysaly, keıbir aımaqtarda qaıyrymdylyqqa baǵyttalýy kerek áleýmettik mańyzdy sharalar túrinde kontsertter, keremet shoýlar jáne jeke avtorlyq keshter satyp alynǵan. Bir ǵana óńirde bul maqsattarǵa 1,7 mlrd teńge jumsalǵan. Qazir memlekettik satyp alý júıesin osy baǵytta qaıta formattaý qajet bolyp otyr», - dep túsindirdi agenttik ókili.