Memlekettik satyp alý zańyna tyń normalar engizilmek

NUR-SULTAN. QazAqparat – Qarjy mınıstri Erulan Jamaýbaev memlekettik satyp alý máseleleri boıynsha zań jobasy sheńberinde jergilikti qamtýdy damytýǵa yqpal eter birqatar norma usynylatynyn málim etti, dep habarlaıdy QazAqparat tilshisi.

«Aldymen negizdemelik kelisimderdi paıdalana otyryp, satyp alýdyń jańa tásili engiziledi. Bul ónim berýshini tańdaýdyń ortasha uzaqtyǵy 1,5 aı bolǵanda, ony 5 kúnge deıin qysqartýǵa múmkindik beredi. Negizdemelik kelisimderdiń uzaqmerzimdiligin eskere otyryp, bul tásil jıi satyp alynatyn taýarlardyń ımportyn almastyrýdy júzege asyrýǵa jáne qazaqstandyq taýar óndirýshilerge ónimderiniń kepildi satylýyn qamtamasyz etýge múmkindik beredi. Sondaı-aq, «Elektrondyq dúken» arqyly satyp alýdyń taǵy bir jańa tásili engiziledi. Ol mańyzy tómen taýarlardy satyp alý kezinde bir kózden alýdyń ornyna paıdalanylady», - dedi Erulan Jamaýbaev Úkimet otyrysynda.

Mınıstr osylaısha báseke ortasy keńeıip, qazaqstandyq bıznestiń, onyń ishinde otandyq óndirýshilerge qoldaý kórsetiletinin jetkizdi.

«Memleket basshysynyń tapsyrmasyna sáıkes zań jobasy memlekettik satyp alýǵa saıası qyzmetshilerdiń qatysýyn boldyrmaıdy. Ol úshin qazirdiń ózinde memlekettik satyp alýdy ortalyqtandyrý boıynsha pılottyq joba iske asyrylýda. Jappaı ortalyqtandyrýdy engizý arqyly uıymdastyrýshylardyń sany aıtarlyqtaı tómendeıdi (25 myńnan shamamen 500-ge deıin). Ákimshilendirý jeńil bolady. Bul memlekettik satyp alýda jergilikti qamtýdy tıimdi retteýge múmkindik beredi», - dedi ol.