Memlekettik satyp alý salasyndaǵy arnaıy tártip merzimi 1 qazanǵa deıin uzartyldy
«Arnaıy tártip arqyly qazaqstandyq taýar óndirýshige aıtarlyqtaı qoldaý kórsetiledi. Osylaısha arnaıy tártipti engizýmen taýarlardy memlekettik satyp alý birinshi kezeńde jeńildetilgen (baǵa usynystaryn suratý tásilimen) túrde jáne otandyq taýar óndirýshiler arasynda ǵana júzege asyrylady. Ótinimder bolmaǵan jaǵdaıda ǵana mundaı taýarlar qalǵan ónim berýshiler arasynda satylyp alynady», - dedi Erulan Jamaýbaev Úkimet otyrysynda.
Onyń aıtýynsha qazaqstandyq óndirýshiler men olar óndiretin taýarlardyń tizbesi Indýstrııa jáne ınfraqurylymdyq damý mınıstrliginiń málimetteri negizinde Memlekettik satyp alý jónindegi vedomstvoaralyq komıssııada aıqyndalady.
«Búgingi tańda Arnaıy tártip arqyly otandyq taýar óndirýshilerden 62 mlrd teńgeden astam somaǵa taýarlar satyp alyndy», - dedi ol.
Erulan Jamaýbaev arnaıy tártip koronavırýsqa qarsy kúres sheńberinde qoldanysta bolǵanyn aıtyp ótti.
«117 mlrd teńgege jedel satyp alýdy júrgizýge múmkindik berdi. Olar: jeke qorǵanys quraldary, ókpege jasandy dem berý apparattary, jedel járdem avtomobılderi, aýrýhanalardy jóndeý, medpersonaldyń tamaqtanýy men jatyn orny. Sondaı-aq arnaıy tártip sheńberinde daǵdarysqa qarsy sharalar qabyldandy. «Jumyspen qamtýdyń jol kartasy» boıynsha 955 mlrd teńgege jumystar, sondaı-aq maýsymdyq jumystar jedel satyp alyndy. Arnaıy tártiptiń tıimdiligin eskere otyryp, onyń qoldanysy 2020 jylǵy 1 qazanǵa deıin uzartylady», - dedi ol.