Memlekettik satyp alý: Bir kózden satyp alý kólemi 50% qysqarady
«Jaqynda memlekettik satyp alý máseleleri boıynsha birqatar zańnamalyq túzetýler kúshine endi. Olar bir kózden alý tásilimen memlekettik satyp alýdy júzege asyrýdyń 6 negizdemesin alyp tastady.
Bul bir kózden satyp alýdyń barlyq kóleminiń shamamen 50%-in quraıdy.
Budan basqa, tapsyrys berýshiniń satyp alýdyń básekelestik tásilderin basym júzege asyrýy jáne bir kózden satyp alý boıynsha tapsyrys berýshiniń birinshi basshysynyń derbes jaýapkershiligi týraly norma kózdelgen», -dedi mınıstr Úkimet otyrysynda.
Onyń aıtýynsha, ashyqtyqty qamtamasyz etýdiń nátıjesinde tikeleı sharttar jasasý arqyly bir kózden memlekettik satyp alý úlesi 2015 jylǵy 92%-ten 2021 jyly 45%-ke deıin tómendegen.
«Óz kezeginde, Qarjy mınıstrligi bir kózden satyp alýdy qoldanýdyń negizdiligine baqylaýdy qamtamasyz etedi», -degen vedomstvo basshysy «Samuryq-Qazyna» ulttyq ál-aýqat qory» AQ jumysyna da osy turǵyda ózgerister enitinin aıtty.
«Osy jyldan bastap Qordyń jáne barlyq ulttyq kompanııalardyń satyp alýlary «Kvazımemlekettik sektordyń jekelegen sýbektileriniń satyp alý týraly» Zańmen retteledi.
Búgingi tańda Qordyń dırektorlar keńesi satyp alý sharttayn bekitý úshin Qarjy mınıstrliginiń kelisimin alý kerek.
Qordyń jáne onyń enshiles kompanııalarynyń satyp alýyn júzege asyrýdyń búkil protsesin ózge ishki qujattarǵa silteme jasamaı, bir qujat deńgeıinde qaralatyn bolady», - dedi Erulan Jamaýbaev.
Aıta keteıik, Memleket basshysy Qasym-Jomart Toqaev Parlament Májilisiniń jalpy otyrysynda kvazımemlekettik sektordyń satyp alýy salasynda karteldi kelisimder jasasý keńinen tarap ketkenin eskertti.