Memlekettik satyp alý: 141 mlrd teńgeniń qarjylyq buzýshylyqtary anyqtaldy

ASTANA. QazAqparat – Memlekettik satyp alý rásimderinde 141 mlrd teńgeniń qarjylyq buzýshylyqtary anyqtaldy. Bul týraly Úkimet otyrysynda Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Osy jyldyń 8 aıynda kameraldyq baqylaý 301 myńǵa jýyq memlekettik satyp alý rásimderin qamtydy. Tekserý qorytyndylary boıynsha 43 514 rásim boıynsha buzýshylyqtar anyqtaldy. Onyń ishinde memlekettik aýdıt obektileri buzýshylyqtardy joıý týraly habarlamalardyń 93 paıyzyn oryndady. 1 522 aýdıtorlyq is-shara ótkizildi», - dedi vıtse-premer.

Onyń atap ótýinshe, 1 trln teńgeden astam bıýdjet qarajaty aýdıtpen qamtyldy. Shamamen 141 mlrd teńge somasynda qarjylyq buzýshylyqtar anyqtaldy.

«Taýarlardy jetkizý, qyzmetterdi kórsetý men jumystardy oryndaý, bıýdjetke óteý jáne esepke alý boıynsha kórsetý jolymen 109 mlrd teńgege buzýshylyqtar joıyldy. Aýdıt obektileri qyzmetin jetildirý jáne tıimdiligin arttyrý úshin 1 551 usynym berildi», - dedi Erulan Jamaýbaev.