Memlekettik reformalardyń tıimdiligin baǵalaıtyn ortalyq qurylady

ASTANA. QazAqparat - QR Prezıdenti Nursultan Nazarbaev memlekettik baǵdarlamalardyń tıimdiligin erekshe baqylaýǵa alýdy tapsyrdy, dep habarlaıdy QazAqparat tilshisi.

"Búginde ındýstrııa, aýyl sharýashylyǵy, ınfraqurylym, densaýlyq saqtaý, bilim jáne taǵy basqa salalar boıynsha memlekettik baǵdarlamar bar. Oǵan qyrýar qarjy bólindi. Sonyń bári júzege asatyn bolsa, halyqtyń jaǵdaıy túzeledi. Osyǵan baılanysty "Nur Otan" partııasy men Prezıdent Ákimshiligine memlekettik baǵdarlamalar men reformalardyń tıimdiligin baǵalaıtyn ortalyqty qurýdy tapsyramyn", - dedi N.Nazarbaev "Nur Otan" partııasynyń XVIII sezinde.

Prezıdenttiń aıtýynsha, atalǵan ortalyqta toqsan saıyn quziretti memlekettik organdardyń baıandamalary tyńdalady. Sonyń negizinde Memleket basshysyna esep beriledi. "Sóıtip, tıisti qorytyndy jasap, sheshim qabyldaımyz. Taǵy aıtamyn, barlyq ekonomıkalyq bastamalar halyqtyń ál-aýqatyn arttyrýy shart. Negizgi maqsat osy", - dep atap kórsetti N.Nazarbaev.

Aıta keteıik, búgin Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy. Budan bólek, múgedek balalardy asyrap otyrǵan otbasylardyń járdemaqysy 30 protsentke ósedi.