Memlekettik rámizder kúni qarsańynda patrıottar forýmy ótedi

ASTANA. QazAqparat – QR Mádenıet jáne sport mınıstrligi Memlekettik rámizderi kúni qarsańynda Qazaqstan patrıottarynyń respýblıkalyq forýmyn ótkizedi, dep habarlaıdy QazAqparat.

Bul jıyn 2 maýsym saǵat 11.00-de Astana qalasyndaǵy Erkeǵalı Rahmadıev atyndaǵy fılarmonııada ótedi.

Oǵan túrli oblystar men óńirlerden túrli qyzmet salalarynyń kórnekti ókilderi, mádenıet jáne óner maıtalmandary qatysady.

«Forým ótkizýdegi maqsat jastardyń memlekettik rámizderge qurmeti men patrıottyq sezimin arttyrý, memlekettik rámizderdi ulttyq biregeılikti bekitýdegi ajyramas bóligi retinde júıeli tanytý. Sonymen birge, táýelsizdigimizdiń negizgi belgisi sanalatyn memlekettik rámizderimizdi patrıottyq tárbıeleý júıesiniń mańyzdy elementi retinde ornyqtyrý», - dep habarlady Mádenıet mınıstrligi.

Sondaı-aq, forým aıasynda óz salasynyń eń laıyqty jáne kórnekti tulǵalary túrli salalardaǵy jetistikteri úshin marapattalady.

Aıta keteıik, jyl saıyn 4 maýsym kúni Qazaqstanda Memlekettik rámizder kúni merekelenedi.

Memlekettik rámizder – kez kelgen memlekettiń egemendigi men birtutastyǵyn beıneleıtin, onyń ajyraǵysyz atrıbýttarynyń biri.