Memlekettik rámizder kúni: Aqmolalyq belsendi jastar marapattaldy

KÓKShETAÝ. QazAqparat - Kókshetaýdaǵy Buqpa taýynyń baýraıynda QR Memlekettik rámizderiniń 26 jyldyǵyna arnalǵan aktsııa ótti, dep habarlaıdy QazAqparat tilshisi.

«Búgin elimiz mańyzdy merekeni atap ótýde. 1992 jyldyń 4 maýsymy el tarıhyna Táýelsiz Qazaqstannyń memlekettik rámizderi qabyldanǵan eleýli kún bolyp endi. Olardy qurmetteý - elimizdiń árbir azamatynyń qasterli paryzy jáne mindeti. Ortasynda altyn tústes kún men qyran qus bederlengen kók Týymyz, shańyraq beınesindegi Eltańba - osylardyń barlyǵy turǵyndar úshin ortaq mekenniń sımvolyna aınalyp, árkez beıbitshilikte, bereke-birlikte ómir súrýge shaqyrady», - dedi Aqmola oblysy ákiminiń orynbasary Aına Mysyrálimova.

Aktsııa barysynda Aına Mysyrálimova memlekettikti nyǵaıtýǵa jáne qazaqstandyq patrıotızmdi qalyptastyrýǵa eleýli úles qosyp júrgen bir top belsendi jastardy Aqmola oblysy əkiminiń Alǵys hattarymen marapattady. Osyndaı joǵary qurmetke laıyq bolǵandardyń arasynda jastar men stýdentter eńbek jasaqtarynyń oblystyq shtabynyń atqarýshy dırektory Janııa Muqasheva,  EKSPO kórmesiniń volonteri, «Jańa tolqyn» jastar birlestiginiń  tóraıymy Jaınagúl Ǵabbasova sııaqty bir top jastar bar.

Odan ári Kókshetaý qalasynyń avtokólik əýesqoılary qaýymdastyǵynyń ókili Qanat Úmbetovke kók Týymyz saltanatty túrde tapsyryldy. Barlyǵy 10 avtokólikten quralǵan kolonna Memlekettik rəmizdi alyp qalanyń basty kóshelerimen júrip ótti.  Merekelik shara jergilikti shyǵarmashylyq ujymdardyń oryndaýyndaǵy kontserttik baǵdarlamaǵa ulasty.