Memlekettik orman qorǵaý jumysynyń tıimdiligi tómen - Erlan Nysanbaev

NUR-SULTAN. QazAqparat - Qazaqstannyń birqatar oblysynda orman aǵashyn zańsyz otaý kólemi artyp barady. Bul týraly QR Ekologııa, geologııa jáne tabıǵı resýrstar vıtse-mınıstri Erlan Nysanbaev vedomstvonyń keńeıtilgen alqa otyrysynda aıtty, dep habarlaıdy QazAqparat tilshisi.

«Aqmola, Shyǵys Qazaqstan, Soltústik Qazaqstan oblystaryndaǵy orman mekemelerinde aǵashty zańsyz kesý kóleminiń ulǵaıyp bara jatqany baıqalatynyn atap ótken oryndy. Bul rette Aqmola men Soltústik Qazaqstan oblystaryndaǵy aǵashtardy zańsyz otaýdyń negizgi faktileri «Ǵarysh sapary» AQ-pen birge orman qory aýmaǵyn ǵaryshtyq monıtorıngileý barysynda anyqtalyp otyr. Al bul atalǵan oblystardaǵy memlekettik orman qorǵaý jumystary tıimdiliginiń tómendigin jáne bizdiń aýmaqtyq bólimsheler tarapynan baqylaýdyń nasharlyǵyn kórsetedi», - dedi ol.

Vıtse-mınıstr sekseýil kóshetterin saqtaý sharalary qabyldanyp jatqandyǵyn aıtty. máselen, ótken jyly 2023 jylǵa deıin sekseýildi kesýge moratorıı uzartyldy. Buǵan qosa, sekseýil kóshetterin egý kólemi de artyp keledi.

«Sekseýil úıdi jylytýǵa, káýáp pisirýge arnalǵan otyn aǵashy degen túsinikti buzyp, onyń ekologııalyq qyzmetterdi de atqaratyn negizgi kóshet ekenin túsindirýge birlese kúsh salýymyz kerek. Bul baǵyttaǵy jumys jalǵasady», - dedi Erlan Nysanbaev.