Memlekettik organdardyń jumys tıimdiligi onyń nátıjesinen kórinedi – Álıhan Smaıylov

ASTANA. QazAqparat – QR Premer-Mınıstri Álıhan Smaıylov tsıfrlyq tehnologııalardy el ómirine engizýge qatysty júktelgen Prezıdent tapsyrmalaryn taǵy bir eske saldy, dep habarlaıdy QazAqparat tilshisi.

«Búginde IT ekonomıkanyń barlyq salasyndaǵy basym mindetterdiń biri. Memleket basshysy 2029 jylǵa qaraı tsıfrlyq tehnologııalardyń ekonomıkadaǵy úlesin 2 ese arttyrý týraly tapsyrma berdi. Sol sııaqty aqparattyq tehnologııalar paıdasynyń jalpy ishki ónimdegi úlesin 1 paıyzǵa jetkizý kerek. Sondyqtan da Prezıdent júktegen mindet barlyq memlekettik organ jáne salalyq vedomstvolardyń damý josparynda aıqyn kórinis tabýy tıis», - dedi Álıhan Smaıylov Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysynda.

Sondaı-aq, Úkimet basshysy vıtse-mınıstrlerdiń jeke jaýapkershiligin arttyryp, ónimdi jumys isteýdi tapsyrdy.

«Mınıstr men qosa onyń orynbasarlary tsıfrlandyrý boıynsha barlyq iske belsendi qatysyp, máseleni baqylaýda ustaý kerek. Memlekettik organdar qyzmetiniń ashyqtyǵy, ýaqytyly sheshim qabyldaýy men tıimdiligi jumys nátıjesinen kórinedi», - deıdi ol.

Buǵan deıin Álıhan Smaıylov qazaqstandyqtardyń jeke málimeti qaýipsizdigin qamtýǵa erekshe mán berý kerektigin eskertken edi.

Odan bólek, qaýipsizdik boıynsha Premer-Mınıstr qozǵaǵan taǵy bir másele - memlekettik organdardyń aqparattyq júıesi. Byltyr olar 500 ret isten shyqqan.