Memlekettik organdardyń tıimdiligi «Halyqpen kezdesý» ındıkatory boıynsha baǵalanady – Úkimet basshysy
«Bıyldan bastap memlekettik organdar jumysynyń tıimdiligi «Halyqpen kezdesý» ındıkatory boıynsha baǵalanady. Osyǵan qarap, olardyń jumysynyń nátıjesin kórsetýge bolady.
Sonymen qatar, «e-Ótinish» aqparattyq júıesine kelip túsetin azamattardyń aryzdaryna qaraıtyn bolsaq, basqasha jaǵdaı qalyptasyp otyr. 2022 jyly osy júıe arqyly 1 mln 700 myńnan astam adam ótinish berdi jáne qaraldy. Onyń 82 paıyzy jergilikti atqarýshy organdarǵa tıesili. ıAǵnı, 2022 jyldyń ekinshi jartysynda azamattardyń jergilikti bılikke joldaǵan aryzdarynyń sany 16 paıyzǵa artqan. Budan kóterilgen problemalardyń bir bóligi jergilikti jerlerde sheshimin tappaǵanyn kóremiz. Sondyqtan azamattar óz máselelerin «e-Ótinish» júıesi arqyly sheshýge májbúr bolǵan», - dedi Á. Smaıylov.
Osy oraıda Úkimet basshysy Almaty jáne Astana qalalarynda, Qaraǵandy jáne Aqtóbe oblystarynda shaǵymdar kóp ekenin aıtty. Turǵyndar qurylys, kólik jáne kommýnıkatsııa, turǵyn úı-kommýnaldyq sharýashylyq jáne halyqqa turmystyq qyzmet kórsetý máseleleri boıynsha memlekettik organdar qabyldaǵan ákimshilik aktilerge, olardyń áreketine nemese áreket etpeýine qatysty kóp shaǵym aıtady.
«Sondyqtan, ákimdikter jergilikti jerlerde máselelerdi sheshýdiń tıimdiligin arttyrýy qajet. Sonda elektrondy júıe arqyly aryzdardyń azaıǵanyn kóremiz», - dedi Premer-Mınıstr.
Bul turǵyda ol mınıstrler men ákimder máselelerdi shuǵyl sheshýge nazar aýdara otyryp, halyqpen kezdesýlerdiń nátıjeliligin arttyrýy kerek ekenin tapsyrdy. Árbir ortalyq jáne jergilikti atqarýshy organdar boıynsha problemalardyń kartasyn ázirleý qajet.
«Josparlanǵan barlyq kezdesýler, olardyń ótetini týraly habarlandyrýlar, sondaı-aq sheshimin tapqan máseleler BAQ pen áleýmettik jelilerde keńinen jarııalanýy tıis», - dedi Álıhan Smaıylov.
Budan buryn habarlanǵandaı, Úkimette ortalyq organdar basshylarynyń halyqpen kezdesý qorytyndylary jarııalandy.
2022 jyly barlyq deńgeıdegi ákimder halyqpen 28,3 myń kezdesý ótkizdi.