Memlekettik organdardyń petıtsııany qaraý merzimi qysqartylmaq
«Atalǵan zań jobalary memlekettik organdardyń, kvazımemlekettik sektordyń ashyq bolý dárejesin keńeıtip, azamattardyń qoǵamdyq belsendiligin arttyrýǵa baǵyttalǵan. Zań jobalary Palatanyń 2022 jylǵy 7 jeltoqsandaǵy jalpy otyrysynda birinshi oqylymda maquldandy», - dedi Májilis depýtaty Erlan Saırov.
Zań jobalarymen jumys barysynda depýtattar kelesi júıeli túzetýler engizdi:
- «Samruq-Qazyna» Ulttyq ál-aýqat qorynda jáne onyń enshiles kompanııalarynda memlekettik áleýmettik jáne ǵylymı-ınnovatsııalyq jobalarǵa, bıýdjet qarajaty esebinen iske asyrylatyn ulttyq jobalarǵa qatysty, sondaı-aq Qor qaıyrymdylyq kómek kórsetken kezde qoǵamdyq baqylaýdy júzege asyrý;
- «Nazarbaev ıntellektýaldyq mektepteri», basqa da derbes bilim berý uıymdaryn qoǵamdyq baqylaý obektilerine jatqyzý;
- qoǵamdyq baqylaý obektisine barýdan bas tartý negizderin naqty aıqyndaý;
- azamattarǵa petıtsııa berý quqyǵyn tek elektrondyq nysanda ǵana emes, qaǵaz túrinde de berý;
- petıtsııany ornalastyrý úshin qajetti daýystar sanyn azaıtý;
- memlekettik organdardyń petıtsııany qaraý merzimin qysqartý (ortalyq memlekettik organdar úshin – 60 kúnnen bastap 40 kúnge deıin jáne jergilikti atqarýshy organdar úshin – 20 kúnge deıin);
- merzimdi qyzmettegi áskerı qyzmetshilerdiń, sondaı-aq áskerı oqý oryndary ulandarynyń, kadetteri men kýrsanttarynyń ómirimen jáne turmysymen tanysý úshin olardyń otbasy múshelerine áskerı bólimderge, oqý oryndaryna barý quqyǵyn berý eskerilgen.
«Sondaı-aq, zań jobasynyń taqyrybyn ózgertý jóninde túzetý engizildi. Jumys tobyna 180-nen astam usynystar kelip tústi, olardyń basym kópshiligi qoldaý tapty. Azamattyq qoǵam, sarapshylar qaýymdastyǵy ókilderi jumys tobynda joǵary belsendilik tanytty. Zań jobasynyń eń basty maqsaty - Konstıtýtsııaǵa sáıkes azamattardyń memleket isterin tikeleı basqarýǵa qatysýyna jaǵdaı jasaý», - dedi depýtat.