Memlekettik organdardyń aqparattyq júıesi byltyr 500 ret isten shyqqan

ASTANA. QazAqparat – Premer-Mınıstr Álıhan Smaıylov memlekettik organdardyń aqparattyq júıesiniń qaýipsizdigi máselesin synǵa aldy, dep habarlaıdy QazAqparat tilshisi.

«Prezıdent memlekettik organdardyń aqparattyq júıesin ortalyqtandyrý, ıntegratsııalaý jáne tıimdiligin arttyrý boıynsha tsıfrlyq platforma ázirleýdi tapsyrdy. Bul – basym mindet, soǵan qaramastan ony júzege asyrý uzaqqa sozylyp otyr. Ótken jyly tek tehnıkalyq qujattama bekitildi, al platforma tıisti ınfraqurylymmen qamtamasyz etilmegen», - dedi Álıhan Smaıylov Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysynda.

Osyǵan oraı, Premer-Mınıstr atalǵan baǵyttaǵy jumysty 2025 jyldyń jeltoqsanyna deıin aıaqtaýdy tapsyrdy.

«Vedomstvolyq deńgeıde jumys isteıtin memlekettik organdardyń aqparattyq júıesiniń úzdiksiz jumys isteý máselesine erekshe nazar aýdarǵym keledi. Ótken jyly aqparattyq júıeler boıynsha 500-ge jýyq aqaý (sboı) tirkeldi, 700 saǵattan astam isten shyǵyp turǵan. Osy sekildi teris faktilerdi mınıstrlik egjeı-tegjeıli taldaý júrigizip, tsıfrlyq vıtse-mınıstrlerge derbes jaýapkershilik júkteý kerek. Sonymen qosa, memlekettik organdardyń aqparattyq júıesiniń úzdiksiz jumysyn qamtamasyz etý tetigin ázirleý qajet», - dep tolyqtyrdy Úkimet basshysy.

Onyń málimdeýinshe, tsıfrlyq vıtse-mınıstrler KPI derekteriniń sapaly oryndalýyn qamtamasyz etýi kerek. Al, mınıstr olardyń jumysynyń tıimdiligine baǵalaý júrgizip, Úkimetti habardar etýi qajet.

Sonymen qatar, Úkimet basshysy qazaqstandyqtardyń jeke málimetine saq bolý kerektigin eskertti.