Memlekettik organdarda nagradalar sany qysqarady

NUR-SULTAN. QazAqparat – Memlekettik organdardyń vedomstvolyq nagradalarynyń dárejeleri alynyp tastalyp jáne uqsas nagradalar biriktiriledi, dep habarlaıdy QazAqparat tilshisi.

Bul týraly QR Mádenıet jáne sport mınıstri Aqtoty Raıymqulova aıtty.

«Qazirgi ýaqytta memlekettik organdardyń vedomstvolyq nagradalardyń jalpy sany – 183. Onyń 103-i medal, 80-i tósbelgi. Osylaısha, vedomtsvolyq nagradalardyń eń kóbi Іshki ister mınıstrliginde – 36, Ulttyq qaýipsizdik komıtetinde 27, Indýstrııa jáne ınfraqurylymdyq damý mınıstrliginde – 21 nagrada bar», - dedi mınıstr Aqordada Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııa otyrysynda.

Onyń aıtýynsha, bekitilgen vedomstvolyq nagradalar tizbesin ońtaılandyrý maqsatynda naqty qadamdar ázirlendi.

«Eń aldymen, nagradalardyń dárejelerin alyp tastaý kerek. Dárejeler 33 vedomstvolyq nagradada qarastyrylǵan. Mysaly, Indýstrııa jáne ınfraqurylymdyq damý mınıstrliginde 1,2,3 dárejeli «Eńbek dańqy» tósbelgisi, ІІM 1,2,3 dárejeli «Minsiz qyzmet úshin» medali, Sybaılas jemqorlyqqa qarsy qyzmette 1,2,3 dárejeli «Minsiz qyzmet úshin» medali qabyldanǵan», -dedi ol.

Sondaı-aq, mınıstr uqsas nagradalardy biriktirý máselesi týraly da aıtty.

«Ekinshiden uqsas nagradalardy biriktirý máselesi týraly aıtar bolsam, «Úzdik avtokólik júrgizýshisi» men «Qurmetti avtokólik júrgizýshisi», «Ádilet organdary júıesiniń qurmetti qyzmetkeri» jáne «Ádilet organdarynyń úzdigi» sııaqty uqsas nagradalar kóp. Sonymen qatar, memlekettik organnyń negizgi qyzmeti men taqyryptyq baılanysty emes nagradalardy alyp tastaý. Mysaly. Joǵarǵy sotta, Bas prokýratýrada, Іshki ister mınıstrliginde, Ulttyq qaýipsizdik komıtetinde bir úlgidegi «Halyqaralyq yntymaqtastyqty damytýǵa qosqan úlesi úshin» degen medal bar. Jalpy osy medal barlyq memorgandarǵa qatysty bolǵandyqtan, onyń birizdiligin jasaǵan durys dep sanaımyz», - dep atap ótti mınıstr.

Osyǵan baılanysty, komıssııa tóraǵasy, Memlekettik hatshy Qyrymbek Kósherbaev Mádenıet jáne sport, Ádilet mınıstrlikterine memlekettik organdardyń vedomstvolyq nagradalaryn ońtaılandyrý boıynsha naqty is-sharalar qabyldaýdy tapsyrdy.