Memlekettik organdar bıýdjetke qatysty aqparatty jarııalamaıdy - depýtat Áshimbaev

ASTANA. QazAqparat - Memlekettik organdar áli kúnge deıin «Aqparatqa qol jetkizý týraly» zańnyń talaptaryn oryndamaı keledi. Kvazımemlekettik kompanııalar da osy zańǵa baǵynýǵa asyqpaıdy. Bul týraly búgin QR Parlament Májilisiniń depýtaty Máýlen Áshimbaev «Ashyq arna» jobasynyń talqylaý alańynda aıtty, dep habarlaıdy QazAqparat tilshisi.

Depýtattyń aıtýynsha, quziretti mekeme tarapynan eskertý jasalǵanda memlekettik organdar resmı saıttaryna tıisti aqparatty sala bastaıdy. Biraq artynan ol jumys taǵy suıylyp ketedi.

«Menińshe, búginde ol zań týraly memlekettik organdardyń barlyǵy birdeı bile bermeıdi. Osy máseleni ashyq aıtý kerek. Iá, Aqparat jáne kommýnıkatsııalar mınıstrligi saıttardy toltyryńdar, barlyq aqparatty salyńdar dep, únemi eske salyp otyrady. Memlekettik organdar basynda salady da, artynan taǵy osy jumysty umytyp ketedi. Shyny kerek, resmı saıttarǵa barlyq aqparat salynbaıdy. Al zańda naqty qandaı aqparattyń salynatyny jazylǵan. Degenmen, memlekettik organdar ol talaptardy oryndamaıdy», - deıdi M.Áshimbaev.

Onyń sózine qaraǵanda, resmı saıttarǵa bıýdjet qarajatyn ıgerýge qatysty tolyq aqparat salynbaıdy. Ol aqsha kimge jáne ne úshin aýdarylyp jatqany da kórsetilýi kerek.

«Zańdy anyq jazylǵan, bıýdjet qarajatyn alatyn jaýapkershiligi shekteýli seriktestikter men úkimettik emes uıymdar da ol aqshany ıgerýge qatysty aqparatty ashyq jarııalaýy qajet. Kvazımemlekettik salada da ondaı problema bar. Búginde ulttyq kompanııalardyń jartysy jáne olardyń enshiles kásiporyndary «Aqparatqa qol jetkizý týraly» zańnyń talaptaryn oryndamaı keledi. Ony bizdiń monıtorıng te rastap otyr», - dep atap kórsetti M.Áshimbaev.