Memlekettik laýazymǵa úmitkerdiń qazaq tilin mindetti túrde bilýi zańnamada rettelmegen - Agenttik
«Qazirgi tańda memlekettik laýazymdarǵa úmitkerler úshin memlekettik tildi meńgerý deńgeıi boıynsha talap joq. Óıtkeni, másele zańnamalyq deńgeıde rettelmegen. Atap aıtqanda, Konstıtýtsııanyń 7-babyna sáıkes Qazaqstan Respýblıkasynda qazaq tili – memlekettik til. Memlekettik uıymdar men jergilikti ózin-ózi basqarý organdarynda qazaq tilimen teń dárejede orys tili resmı túrde qoldanylady. Konstıtýtsııanyń 14-babynda eshkimdi shyǵý tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline, dinge kózqarasyna, nanymyna, turǵylyqty jerine baılanysty nemese kez kelgen basqa mán-jaılar boıynsha kemsitýge bolmaıtyndyǵy kórsetilgen. Konstıtýtsııanyń 14-babynda kózdelgen quqyqtar men bostandyqtar eshbir jaǵdaıda shektelýge jatpaıdy (Konstıtýtsııanyń 39-baby 3-tarmaǵy). Konstıtýtsııanyń 33-baby 4-tarmaǵynda respýblıka azamattarynyń memlekettik qyzmetke kirýge teń quqyǵy bar», - dep jazady Memlekettik qyzmet isteri agenttigi basshysynyń mindetin atqarýshy Salaýat Múksimov.
Sondaı-aq, ol memlekettik qyzmetshi laýazymyna kandıdatqa qoıylatyn talaptar laýazymdyq mindetterdiń sıpatyna ǵana baılanysty bolatynyn aıtady.
«Osyǵan qaramastan, Agenttik memlekettik qyzmette memlekettik tildiń aıasyn keńeıtý maqsatynda keshendi sharalardy júzege asyryp keledi. Atap aıtqanda, 2021 jyly ótkizilgen Prezıdenttik jastar kadr rezervine irikteýde úmitkerlerge memlekettik tildi kem degende orta deńgeıde (V1) meńgerý talaby engizildi.
Bul rette, bıyl úshinshi ret uıymdastyrylýy josparlanyp otyrǵan Prezıdenttik jastar kadr rezervine irikteý kezinde de memlekettik tildi bilý negizgi talap retinde bekitildi. Sonymen qatar, 2022 jyldan bastap Qazaqstan Respýblıkasy Prezıdentiniń janyndaǵy Memlekettik basqarý akademııasyna joǵary oqýdan keıingi bilim alýshy úmitkerlerge memlekettik tildi keminde orta deńgeıde (V1) bilýi boıynsha sertıfıkattarynyń bolýy týraly talap engizildi», - delingen jaýapta.