Memlekettik qyzmettiń ádebi eskerilse...

ASTANA. QazAqparat - Keshe Almaty qalasynyń ákimshilik ǵımaratynda Qazaqstan Respýblıkasynyń memlekettik qyzmet isteri mınıstrliginiń Almaty qalasy boıynsha departamenti men Almaty qalasy ákimdigi birlesip, «Azamattardyń quqyqtary men zańdy múddelerin qorǵaý qyzmetin júzege asyrýdaǵy qyzmettik etıka jáne joǵary rýhanı-adamgershilik ahýal» atty taqyrybynda alqasóz ótkizdi, dep jazady «Aıqyn» gazeti búgingi sanynda.

Almaty qalalyq soty, proký­ratýra, ishki ister departamentiniń, úkimettik emes uıymdardyń bas­shy­lary qatysqan bul jıynnyń maq­saty - azamattardyń quqyq­tary men zańdy múddelerin qorǵaý qyz­metin júzege asyrýdaǵy qyzmettik etıka jáne joǵary rýhanı-adam­gershilik ahýaldy qalyptastyrý. Otyrysty QR memlekettik qyzmet isteri mı­nıstrliginiń Almaty qalasy bo­ıynsha departamenti Sybaılas jemqorlyqtyń aldyn alý basqar­masynyń basshysy Maqsathan Anapın kirispe sózben ashty. Jıyn­da Almaty qalalyq sotynyń sýdıa­sy Bolatbek Qatyq­baev, «Halyq­aralyq quqyq qorǵaý ortalyǵy» qoǵamdyq birlestiginiń prezıdenti Jandildá Jaqypov, Almaty qalasy prokýratýrasy basqarma­synyń aǵa prokýrory Erlan Sapaev, Almaty qalalyq ishki ister departamentiniń Kadr jumystary basqarmasy basty­ǵynyń oryn­basary Oljas Myrza­bekovter baıandama jasap, memle­kettik qyz­metterde, quqyq qorǵaý organ­darynda qyzmettik etıkany qalyp­tastyrý jumys­tarynyń qalaı júr­gizilip jatqandyǵynan habar­dar etti. 

Memleket basshysy Nursultan Ábishuly Nazarbaev jarııalaǵan bes ınstıtýtsıonaldyq reforma aıasynda «Ult jospary - 100 naqty qadam» josparynyń 13 qadamyn­daǵy sybaılas jemqorlyqqa qarsy is-qımyldy kúsheıtý men memle­kettik qyzmettiń jańa modelinde memlekettik qyzmetshilerdiń mo­raldyq-adamgershilik beınesine jáne iskerlik qasıetterine qoıy­latyn talaptardy joǵarylatý maqsatynda ádeptilik normalary men minez-qulyq qaǵıdalaryn odan ári jetildirý jóninde Qazaqstan Respýblıkasy Prezıdentiniń 2015 jylǵy 29 jeltoqsandaǵy №153 Jarlyǵymen bekitilgen Ádep jónindegi kodeksi qabyldandy. 

Ádep jónindegi kodeks halyqtyń memlekettik organdarǵa senimin nyǵaıtýǵa, memlekettik qyzmette ózara qarym-qatynastyń joǵary mádenıetin qalyp­tastyrýǵa jáne memlekettik qyzmet­shilerdiń ádepsiz minez-qulyq jaǵ­­daı­­la­rynyń aldyn alýǵa baǵyttalǵan. Jańa kodeks memlekettik qyzmetshilerdiń jalpy qabyldanǵan moraldyq-ádeptilik normalaryn saqtaýǵa, azamattarmen jáne áriptesterimen qarym-qatynasta sypaıylyq pen ádeptilik tanytýǵa negizdelgen. Sondaı-aq, memlekettik qyzmetshiler qabyldaıtyn túrli sheshimderiniń zańdylyǵy men ádildigi, jeke jáne zańdy tulǵalardyń quqyqtary men zańdy múddelerin qozǵaıtyn sheshimderdi qabyldaýdyń ashyqtyǵy men aıqyndyǵyn qamtamasyz etedi. Mem­lekettik organdar tarapynan atqarylyp jatqan jumystardyń tıimdiligine kedergi jasaıtyn is-áreketterdi boldyrmaý, aldyn alý sharalaryn ýaqytynda uıymdastyrady. Kez kelgen memlekettik qyzmetshi óziniń is-áreketimen jáne minez-qulqymen qoǵam tarapynan aıtylatyn synǵa sebepker bolmaýǵa, jeke sıpattaǵy máselelerdi sheshý kezinde basqa da memlekettik qyzmetshilerdiń qyzmetin paıdalanbaýǵa, shyndyqqa kelmeıtin málimetterdi taratpaýy tıis. Sonymen qatar mem­lekettik qyzmetshiler qyzmetten tys ýaqyttaǵy, qyzmettik qatynastardaǵy, kópshilik aldynda, onyń ishinde buqaralyq aqparat quraldarynda sóıleýmen baılanysty minez-qulyq standarttaryn belgilengen talaptarǵa sáıkes, memlekettik qyzmettiń bedeline nuqsan keltirmeı, abyroımen atqarýy tıis.

Ádep jónindegi kodekske sáıkes memlekettik organdarda ádep jónindegi ýákilder engizildi, ol memlekettik qyzmettiń ádep normalarynyń saq­talýyn, memlekettik qyzmet, sybaılas jem­qorlyqqa qarsy is-qımyl týraly zańnama men Qazaqstan Respýblıkasy memlekettik qyzmetshilerdiń quqyq-buzýshylyqtardyń aldyn alý máselelerin qamtamasyz etý qyzmetin júzege asyrady. Ádep jónindegi ýákildiń negizgi qyzmeti memlekettik qyzmetshilerge Ádep kodeksiniń talaptaryn saqtaý máseleleri boıynsha ádistemelik kómek kórsete otyryp, memlekettik qyzmetshilerdiń zańdarda belgilengen shekteýler men tyıymdardy saqtaýyna yqpal etedi. Memlekettik qyzmetshilerdiń quqyqtary men zańdy múddeleri buzylǵan jaǵ­daılarda, olardy qorǵaýǵa jáne qalpyna keltirýge baǵyttalǵan sharalardy qabyldap, memlekettik qyzmetshilerdiń ádep normalaryn saqtaýyn monı­torıngteýdi jáne baqylaýdy júzege asyrady. Ádep kodeksin buzýdyń aldyn alý, oǵan jol bermeý, sondaı-aq memlekettik qyzmettiń oń beınesin qalyptastyrý maqsatynda azamattyq qoǵam ınstıtýttarymen jáne memleket­tik organdarmen ózara is-qımyl jasaıdy. Olardyń qyzmetin úılestirý Qazaqstan Respýblıkasynyń Memlekettik qyzmet isteri mınıstrligine júkteledi.