Memlekettik qyzmetterdiń 80% eGov mobile-ǵa shyǵarylady

ASTANA. QazAqparat – «Ulttyq aqparattyq tehnologııalar» AQ Basqarma tóraǵasy Rostıslav Konıashkın memlekettik qyzmetterdi smartfondandyrýdyń aralyq qorytyndylary týraly aıtyp berdi, dep habarlaıdy QazAqparat tilshisi.

Onyń aıtýynsha, jyl sońyna deıin barlyq memlekettik qyzmetterdiń 80%-y eGov mobile mobıldi qosymshasynda qoljetimdi bolady.

«Mobıldi qosymsha arqyly aı saıyn shamamen 1,2 mln memlekettik qyzmet kórsetiledi. Al 2022 jyly eGov mobile arqyly 11 mln-nan astam memlekettik qyzmet kórsetildi. Ázirge mobıldi qosymshada 641 memlekettik qyzmet qoljetimdi, onyń 167-si – elektrondy úkimet servısi men portalynyń qyzmetteri jáne 474-i – jeke tulǵalarǵa arnalǵan qyzmet túrleri», - dedi R. Konıashkın Ortalyq kommýnıkatsııalar qyzmetinde ótken baspasóz máslıhatynda.

Spıker Memleket basshysynyń tapsyrmasymen, 2025 jylǵa qaraı memlekettik qyzmetterdiń 100% eGov mobile mobıldi qosymshasynda qoljetimdi bolýy keregin aıtty. Jyl sońyna deıin bul kórsetkishti 80%-ǵa jetkizý josparlanýda.

Aıta keteıik, eGov mobile mobıldi qosymshasy tsıfrlandyrý ónimderiniń biri retinde 2019 jyly iske qosylǵan.

«Qosymsha qazaqstandyqtar arasynda úlken suranysqa ıe. Mobıldi qosymshanyń paıda bolǵaly turǵyndar Halyqqa qyzmet kórsetý ortalyqtaryna barmaı-aq, kompıýterden ǵana emes, barlyǵy derlik paıdalanatyn uıaly telefonnan da ońaı jáne qarapaıym qyzmetterdi alyp júr. Óz derekterine qol jetkizý úshin, memlekettik qyzmetterdi alý úshin azamattarǵa smartfondardy paıdalaný ońaıyraq ekenin túsindik. Tsıfrlyq damý mınıstrligimen birge memlekettik qyzmetterdi smartfondandyrýǵa basa nazar aýdaramyz. Atap aıtqanda, naýryz aıynda biz mobıldi qosymshanyń ınterfeısin jańarttyq jáne ony kórsetiletin qyzmetti alýshylar úshin qarapaıym ári túsinikti etip jasadyq, onyń ishinde Tsıfrlyq qujattar boıynsha jańa fýnktsıonal jasadyq», - deıdi R. Konıashkın.

Buǵan deıin Rostıslav Konıashkın áskerı bıletter EGOV mobile platformasyna qashan shyǵarylatynyn aıtqan edi.