Memlekettik qyzmetter salasyndaǵy jumyskerlerdiń kásibı merekesi bekitilmek

ASTANA. QazAqparat – 15 sáýir - memlekettik qyzmetter salasyndaǵy jumyskerler kúni merekesi bolyp bekitilmek. Bul týraly «Ashyq» NQA portalynda jarııalanǵan Úkimet qaýlysynda jazylǵan, dep habarlaıdy QazAqparat tilshisi.

«QR merekelik kúnderdiń tizbesin bekitý týraly» QR Úkimetiniń qaýlysy - «Memlekettik kórsetiletin qyzmetter salasyndaǵy qyzmetkerler kúni - 15 sáýir» degen 5-1-tarmaqpen tolyqtyrylsyn», - delingen qujatta.

Qaýlyǵa qosymsha berilgen túsindirmede bul bastama memlekettik qyzmetter salasynda eńbek etetin jumyskerler arasynda korporatıvtik mádenıetti damytýǵa yqpal etetini kórsetilgen.

«Memlekettik kórsetiletin qyzmetter salasyndaǵy qyzmetkerlerdiń jalpy sany 20 myńnan astam adamdy quraıdy. Alaıda, búgingi kúni memlekettik qyzmetterdi kórsetý salasyndaǵy qyzmetkerlerdiń ózderiniń kásibı merekelerin atap ótý múmkindigi joq jáne osyndaı mereke bolmaǵandyqtan, biryńǵaı kásibı qoǵamdastyq salasyna ózderiniń tıistiligin sezinbeıdi. Atalǵan kásibı merekeni tizimge engizý kásibı qoǵamdastyqtyń biryńǵaı salasyna jatatynyn sezinýge múmkindik berip, korporatıvtik mádenıettiń odan ári damýyna yqpal etedi», - dep túsindirme berilgen qaýlyǵa.

Qaýlyny ashyq talqylaý 1 naýryzǵa deıin jalǵasady.