Memlekettik qyzmette «komandalyq kóship-qoný» 40-50 ese azaıdy - Á.Báımenov

ASTANA. 19 qarasha. QazAqparat - Memlekettik qyzmette «komandalyq kóship-qoný» 40-50 ese azaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda QR Memlekettik qyzmet isteri agenttiginiń basshysy Álıhan Báımenov málim etti.

«Konkýrstardyń rólin arttyrý úshin Prezıdenttiń tapsyrmasy boıynsha, aýysym tártibimen taǵaıyndaý, komandalyq dep atalatyn kóship-qonýdy azaıtý jańa zańnamamen júzege asa bastady. Nátıjesinde, eger byltyrǵy jyly toqsan saıyn 3,5 myń adam bir memlekettik organnan ekinshi memlekettik organǵa aýysymmen taǵaıyndalyp júrse, jańa zań kúshine engennen keıin orta eseppen toqsanda 70-80 adam taǵaıyndalatyn boldy. Bul - 40-50 ese azaıdy degen sóz», - dep atap ótti Á.Báımenov.

Onyń sózine qaraǵanda, byltyr barlyq 20 myń taǵaıyndaýdyń ishinde 70 paıyzy aýysym tártibimen júzege asyrylǵan bolsa, bıyl zań kúshine engennen bergi eki toqsanda aýysymmen taǵaıyndalǵandardyń úlesi 20 paıyzdan az bolyp otyr.

"Bul tikeleı Elbasynyń tapsyrmasyn iske asyrý aıasynda múmkin bolyp otyr", - dedi ol.