Memlekettik qyzmetshilerge namaz oqýǵa tyıym salý - túbegeıli sheshilgen joq - mınıstrlik
Arynnyń sózinshe, mınıstrlikke osy jáne basqa da máseleler týraly usynystar túsip jatyr, ol usynystardyń arasynda memlekettik qyzmetshilerdiń jumys ýaqytynyń tártibin saqtamaýyna qatysty shaǵymdar da bar. Ásirese, azamattar memlekettik qyzmetshilerdiń jumys ýaqytynda dinı ǵımarattarǵa barýynyń jáne dinı joralardy óteýiniń qanshalyqty zańǵa sáıkes keletinine túsinik berýdi suraǵan saýaldar kóp.
«Elimizdiń Konstıtýtsııasyna sáıkes ár azamattyń ar-ujdan bostandyǵyna kepildik beriledi. Degenmen, biz memlekettik qyzmettiń bul salada jumys isteıtinderge birqatar shekteýler qoıatynyn umytpaýymyz kerek. Memlekettik qyzmetke kelmesten buryn adam mundaı shekteýlermen kelisedi. Árıne, bul túsinikti, óıtkeni memlekettik qyzmetshi eń aldymen óziniń tikeleı laýazymdyq mindetterin oryndaýy kerek. Máselen, jumys ýaqytynda azamattardy qorǵaýǵa nemese qyzmet atqarýǵa mindetti áskerı qyzmetker nemese polıtseı dinı is-sharaǵa qalaı qatysady?», - dedi vıtse-mınıstr.
Sonymen qatar, onyń aıtýynsha, memlekettik qyzmetshilerdiń dinı uıymdar qyzmetine qatysýyna baılanysty shekteýler 2015 jyly bekitilgen Qazaqstan Respýblıkasy memlekettik qyzmetshileriniń Ádep kodeksinde bar ekenin eske saldy.
«Ekinshiden, bul usynys barlyq dinge senýshilerge emes, tek memlekettik qyzmetkerlerge jáne tek jumys ýaqytyna ǵana qatysty. Sondaı-aq bul másele musylmandarǵa ǵana emes, dinı senimine qatystylyǵyna qaramastan barlyq memlekettik qyzmetshilerge qatysty. Úshinshiden, mundaı shekteýler memlekettik qyzmetshilerdiń dinı senim quqyǵyn taptamaıdy. Árbir azamat, onyń ishinde memlekettik qyzmetker qudaıǵa senýge nemese senbeýge quqyly. Biraq, dinı senimdi oryndaýmen baılanysty praktıkalyq áreketter basqa azamattarǵa jáne memlekettik qyzmetke keri áserin tıgizbeýi qajet», - dedi D. Aryn.
Sóz sońynda ol, bul usynystar men túzetýler áli de bolsa talqylaný ústinde ekendigin jáne bul týraly túbegeıli sheshim áli qabyldanǵanbaǵandyǵyn málim etti.