Memlekettik qyzmetshilerdiń 50 paıyzy qashyqtan jumys isteı beredi
13:41, 11 Mamyr 2020
NUR-SULTAN. QazAqparat – Memlekettik qyzmetshilerdiń 50 paıyzy qashyqtan jumys isteı beredi. Bul týraly Memleket basshysy Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda málim etti, dep habarlaıdy QazAqparat.
«Memlekettik qyzmetshilerdiń 50 paıyzy qashyqtan jumys isteı beredi. Jeke kásiporyn basshylary qansha qyzmetkerdi jumysqa shyǵaratynyn ózderi anyqtaýǵa tıis. Jurttyń kóbi áli de úıde otyra turǵany durys bolar edi. Bul – eń aldymen, adamdardyń qaýipsizdigine baılanysty másele», - dedi Prezıdent.
Osy oraıda Memleket basshysy jumys ornynda áleýmettik araqashyqtyq jáne qatań sanıtarlyq rejım saqtalýy qajet ekenin atap ótti.