Memlekettik qyzmetshilerdi irikteý: A korpýsyna rezerv joıylady
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev vedomstvanyń keńeıtilgen alqa otyrysynda málimdedi.
Agenttik tóraǵasy 2018 jyldaǵy memlekettik qyzmet jaǵdaıy týraly ulttyq baıandama ázirlenip jatqanyn málimdedi jáne ondaǵy memlekettik qyzmetti damytýdyń birneshe baǵyttaryn atap ótti.
«A korpýsyna irikteý tártibi qaıta qaralady. Atap aıtqanda, A korpýsyna rezevti joıyp, tikeleı konkýrstyq irikteý júrgizý usynylyp otyr. B korpýsy da úsh kezeńdik irikteýden eki kezeńge qysqarady. Qazir memlekettik organnyń ózinde ishki konkýrs ótedi, sodan keıin búkil memlekettik qyzmet arasynda baıqaý jarııalanady jáne sodan keıin ǵana ózge nıet bildirýshilerdiń qatysý múmkindigi týady.
Agenttik tóraǵasy keltirgen málimetterge sáıkes, taǵaıyndaýlardyń 57 protsenti memorgannyń ishki baıqaýy nátıjesinde, 16 protsenti - ózge organdardan bolsa, 27 protsentinde - azamattyq sektordan kelgen mamandar taǵaıyndalǵan.
«Osyny eskere otyryp, taǵy da taldaý júrgizdik jáne halyqaralyq tájirıbelerdi zerttedik. Nátıjesinde aldyńǵy eki kezeńdi qysqartýdy uıǵaryp otyrmyz. Bul arqyly konkýrs júrgizý ýaqytyn úsh esege - 50 kúnnen 15 kúnge deıin qysqartýǵa bolady», - dedi Shpekbaev.
Sonymen birge, Shpekbaev jańa jyldan bastap, quqyq qorǵaý júıesi men Ulttyq bıýronyń da konkýrstyq negizge ótetinin habarlady.
«Jańa jyldan bastap, quqyq qorǵaý júıesi men Ulttyq bıýro konkýrstyq negizge aýystyrylady. Odan bólek, quziretti jáne talantty mamandardy kadrlyq saıasat jónindegi ulttyq komıssııa arqyly konkýrstan tys taǵaıyndaý múmkindigi de qarastyrylady. Osy arqyly batystyq bilimi men tájirıbesi bar kásibı mamandardy jeke sekordan memlekettik qyzmetke tarta alamyz. Bul jerde álemniń úzdik 500 kompanııasynda jumys istegen nemese úzdik JOO-larynyń PhD dárejesin alǵan mamandar týraly aıtyp otyrmyz», - dep óz sózin túıindedi Alık Shpekbaev.