Memlekettik qyzmetshiler zańdy jıi buza bastady - tekseristiń nátıjesi

ASTANA. QazAqparat  - QR Memlekettik qyzmet ister jáne sybaılas jemqorlyqqa qarsy is-qımyl agenttigi jospardan tys tekseristerdiń nátıjesin jarııalady, dep xabarlaıdy QazAqparat tilshisi agenttiktiń baspasóz qyzmetine silteme jasap.

Resmı málimetke sáıkes, ótken jyldyń alǵashqy toqsanymen salystyrǵanda, bıyl ákimshilik isterdiń sany 7 ese ósken. Jaýapqa tartylǵan memlekettik qyzmetshilerdiń basym bóligi  konkýrstyq irikteý erejesin buzyp, qol astyndaǵy adamdardy memlekettik qyzmetten negizsiz bosatqan. Sondaı-aq ondaı qyzmetshiler qarjylyq baqylaý sharalary men memlekettik qyzmetti kórsetý merzimin jıi buzyp otyrady.

"Mysaly,  bos memlekettik ákimshilik laýazymyna ornalasýǵa konkýrstyq irikteý rásimin buzǵany úshin QR Investıtsııalar jáne damý mınıstrligi konkýrstyq komıssııasynyń músheleri - kólik komıtetiniń tóraǵasy  A. Asaýbaev, syrtqy ekonomıkalyq yntymaqtastyq departamentiniń dırektory A. Daýletov jáne kadr jumysy departamentiniń dırektory K. Qasenovterge 30 AEK (68 070 teńge) kóleminde aıyppul salyndy. Jalpy, aǵymdaǵy jyldyń alǵashqy toqsanynda memlekettik qyzmet salasyndaǵy ákimshilik ister boıynsha 2 mln. 445 myń teńge bıýdjetke óndirildi", - delingen agenttiktiń resmı xabarlamasynda.

Agenttik jyl basynan beri  352 tekseristi ótkizdi. Sonyń nátıjesinde memlekettik qyzmet salasyndaǵy zańnamany buzýdyń 2467 oqıǵasy anyqtaldy. Agenttikke aryzdanǵan 103 adamnyń quqyqtary qorǵaldy. 191 memlekettik qyzmetshi tártiptik jaýapkershilikke tartyldy. Budan bólek, agenttik 55 laýazymdy tulǵany jaýapqa tartty.