Memlekettik qyzmetshiler úıden jumys isteýi úshin qandaı sharalar atqaryldy
«QR Tsıfrlyq damý, ınnovatsııalar jáne aeroǵarysh ónerkásibi mınıstrligi (TsDIAÓM) «UAT» AQ, Memlekettik tehnıkalyq qyzmet jáne baılanys operatorlarymen birlesip, memlekettik qyzmetshilerdi ózderiniń jumys júıelerine, ıaǵnı elektrondyq poshta men elektrondy qujat aınalymyna qashyqtan qosý úshin tıisti tehnıkalyq sheshimdi iske asyrdy. Bul memlekettik qyzmetshilerge úıde otyryp,elektrondy qujat aınalymy júıesine kelip túsken hat-habarmen jumys isteýge múmkindik beredi», - delingen atalǵan mınıstrlik habarlamasynda.
Atap aıtqanda, bul shara Qazaqstan Prezıdentiniń eldegi tótenshe jaǵdaı kezinde memlekettik jáne kvazımemlekettik sektordaǵy barlyq qyzmetkerlerdiń 70 paıyzyn qashyqtan jumys isteýge kóshirý týraly tapsyrmasyn oryndaý maqsatynda qabyldandy.
Belgili bolǵandaı, TsDIAÓM-niń 150-den astam qyzmetkeri qajetti aqparattyq júıelerge, elektrondy poshta men qujat aınalymyna qosylý arqyly qashyqtan jumys isteýge múmkindik aldy. Sondaı-aq, barlyq memlekettik organ qyzmetkerlerin óz organdarynyń aqparattyq júıesine qashyqtan qosý jumystary bastaldy.
«Jumys kezeń-kezeńmen júrgiziledi. Dál qazirgi ýaqytta Energetıka, Ekologııa, Densaýlyq saqtaý, Eńbek jáne halyqty áleýmettik qorǵaý mınıstrlikteri aqparattyq júıelerge qosylýda. Bul jumystyń nátıjesinde taıaýda 30 000-nan astam memlekettik qyzmetshi úıden jumys isteýge múmkindik alady», - delingen taratylǵan málimette.
Bul múmkindikti usyný úshin baılanys operatorlary qashyqtan qosylý oryndarynda baılanys arnalarynyń parametrlerin eskere otyryp, qajetti ınfraqurylymdy daıyndady. Memlekettik qyzmetshilerdi qujat aınalymy júıesine qashyqtyqtan qosýdy uıymdastyrý úshin elektrondy qujat aınalymynyń biryńǵaı júıesi platformasynan bultty tehnologııalarǵa kóshý júzege asyrylady.