Memlekettik qyzmetshiler kúni: Qazaqstanda kadrlardyń aýysýy eki esege qysqardy
Óz quttyqtaýynda Memlekettik hatshy elimizde 98 myńǵa jýyq memlekettik qyzmetshiniń tabysty eńbek etip júrgenin atap ótti.
«Ekonomıkalyq yntymaqtastyq jáne damý uıymy sarapshylarynyń pikirinshe, Qazaqstandaǵy memlekettik qyzmet júıesi jahandyq standarttarǵa sáıkes keledi, al memlekettik apparattyń qartaıýy men genderlik teńgerimsizdik kórsetkishteri boıynsha, olardyń aldyn alý baıqalǵan. (...) 2015 jyldan beri kadrlardyń aýysýy eki esege qysqardy (2015 jyly 11,2%, 2017 jyly - 6,2%). Baqylaýshylar men sarapshylar ınstıtýtynyń arqasynda irikteý barysy anaǵurlym ashyq jáne transparentti bola tústi», - dedi Memlekettik hatshy Memlekettik qyzmetshiler kúnine oraı uıymdastyrylǵan gala-kontsertte.
Onyń aıtýynsha, Qazaqstanda mansaptyq jolda ósken memlekettik qyzmetshiler sany 4 esege artqan jáne halyqtyń konkýrstyq protsedýra men jalpy memlekettik qyzmetke degen senimi ulǵaıǵan.
«Memleket basshysy bıylǵy joldaýynda óz tarıhyn, tilin, mádenıetin biletin, zamanyna laıyq, shet tilderin meńgergen ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýy tıis dep atap ótti. Biz - memlekettik qyzmetshiler kóshbasshynyń syndarly saıasatyn júzege asyrýshy retinde atalǵan talaptarǵa saı bolý úshin bar kúsh-jigerimizdi, bilim men biligimizdi jumsaýǵa tıispiz», - dedi Gúlshara Ábdiqalyqova.
Aıta keteıik, Qazaqstanda 23 maýsym - Memlekettik qyzmetshiler kúni bolyp jarııalanǵan. Búgin Astanada «Qazaqstan Respýblıkasynyń úzdik memlekettik qyzmetshisi» respýblıkalyq konkýrsynyń jeńimpazdary marapattaldy. Konkýrstyń eń jas jeńimpazy 24 jasta bolsa, eń úlkeni - 53 jasta.