Memlekettik qyzmetshige jaraspaıdy - Agenttik qymbat jıhaz alǵan ákim týraly

NUR-SULTAN. QazAqparat - Memlekettik qyzmet isteri agenttiginiń tóraǵasy Anar Jaıylǵanova Pavlodar ákiminiń qymbat jıhaz alýyna qatysty pikir bildirdi, dep habarlaıdy QazAqparat.

«Meniń oıymsha, mundaı shyǵynǵa jol berilmeýi kerek. Pavlodar oblysynyń ákimi senimdi aqtamady dep durys aıtty. Bul tipti talqylanbaıdy da. Eger adam shynymen memlekettik qyzmetshiniń jalaqysyna ómir súrse, mundaı qymbat jıhazdy ala almas edi. Áleýmettik máselelerdi, kópbalaly, jalǵyzbasty, múgedek balasy bar analardyń máselesin, baspana túıinin sheshe almaı júrgenimizde bulaı keýde kerý memlekettik qyzmetshige jaraspaıdy», - dedi agenttik basshysy Úkimet úıinde ótken baspasóz máslıhatynda.

Buǵan deıin Pavlodar oblysynyń ákimi Bolat Baqaýov qala ákimi Ánýar Kúmpekeevke qatań sógis jarııalaǵan bolatyn.

«Ánýar Kúmpekeev qymbat páter satyp alýǵa baılanysty bıýdjet qarajatyn tıimsiz jumsap, ysyrap etkeni úshin sógis aldy, - dedi oblys ákimi. - Soǵan qaramastan, taǵy da qatelikke jol berip, alty mıllıon teńgege eben jıhazyn satyp aldy. Prezıdenttiń bıýdjetten artyq shyǵyndardy jumsaýǵa tyıym salý týraly tapsyrmasyn elemedi. 11 maýsymda oǵan qatań sógis jarııalandy», - dedi Bolat Baqaýov.