Memlekettik qyzmetshi tabysy týraly jarııa túrde esep beretin bola ma

ASTANA. QazAqparat – Memlekettik qyzmetshi tabysy týraly jarııa túrde esep beretin bola ma? Dál osy saýalǵa Ulttyq ekonomıka vıtse-mınıstri Azamat Ámrın jaýap berdi, dep habarlaıdy QazAqparat tilshisi.

Úkimet otyrysynan keıin BAQ ókilderine uıymdastyrylǵan brıfıngte jýrnalıster vıtse-mınıstrden: «Saıası memlekettik qyzmetshiler men ózge de sheneýnikterdiń tabystary týraly jarııa túrde esep berýi josparlanyp otyr ma?» - dep suraǵan edi.

Saýalǵa jaýap bergen vıtse-mınıstr jalpyǵa ortaq deklaratsııalaý kezeń-kezeńmen engizilip jatqanyn atap ótti.

«2020 jyldan bastap memlekettik qyzmetshiler birinshi bolyp esep bere bastady. Bul alǵashqy kezeń bolatyn. Biz jyl saıyn deklaratsııa tapsyramyz. Kelesi jyldan bastap kásipkerler, al 2025 jyldan bastap qalǵan halyqtyń bári deklaratsııa tapsyrady. Jarııalylyqqa keler bolsaq, zańnamada mundaı kózdelmegen, bekitilgen. Sondyqtan ondaı bolmaıdy»,- dedi Azamat Ámrın.