Memlekettik qyzmetshi qandaı bolýy kerek

ALMATY. QazAqparat - QR Sybaılas jemqorlyqqa qarsy kúres agenttiginiń Almaty departamenti «Sanaly urpaq» respýblıkalyq jobalyq keńsesiniń jetekshisi Qaıyrjan Toqyshev memlekettik qyzmetshi qandaı bolýy kerektigin aıtty, dep habarlaıdy QazAqparat tilshisi.

«Qazaqstan Respýblıkasy memlekettik qyzmetshileriniń ar-namys kodeksi bar. Onda memlekettik qyzmetshiniń barlyq mindetteri men quqyqtary jazylǵan. Birinshiden, ol QR Prezıdentiniń saıasatyn ustanýy kerek. Ekinshiden, adamgershiligi mol, adal, adamdardy tyńdaı biletin, memlekettik qyzmetshilerdiń kez kelgen suraǵyna jedel jaýap beretin, qoǵamdyq orynda ózin mádenıetti ustaıtyn qyzmetker bolýy tıis. Eger memlekettik qyzmetshi qoǵamdyq orynda ersi qylyq kórsetip, kópshilik nazaryna ilikse, onda oǵan qatysty jeke tekserý júrgiziledi. Eger faktiler rastalsa, memqyzmetshi jaýapqa tartylady», - dep túsindirdi Qaıyrjan Toqyshev.

Buǵan deıin memlekettik qyzmetshilerge jańa jyldyq merekeni atap ótkenshe, muqtaj otbasylarǵa kómektesý usynylǵan bolatyn.