Memlekettik qyzmetkerler óz bilimderin shyńdaýǵa asyqpaıdy - attestatsııa

ASTANA. QazAqparat  - QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymovanyń aıtýynsha, bıylǵy attestatsııanyń alǵashqy kezeńi aıasynda birqatar máseleler anyqtaldy, dep habarlaıdy QazAqparat  tilshisi.

«Memlekettik qyzmetkerlermen suhbattasý barysynda biz olardyń ókilettilikterine qatysty birqatar máselelerdi anyqtadyq. Máselen, ortalyq apparattaǵy qyzmetkerler bolsyn, jergilikti jerdegi memlekettik qyzmetkerler bolsyn, olardyń barlyǵy ózdigimen bilimderin shyńdaýǵa asyqpaıdy. Bylaısha aıtqanda, kásibı biliktilik deńgeılerin kótermeı júredi. Osyǵan baılanysty qazirdiń ózinde arnaıy oqytý baǵdarlamalaryn ázirleýge kiristik. Biz ony árbir qyzmetkerdiń kásibı deńgeıine qaraı beıimdeıtin bolamyz», - dedi Shaıymova búgingi baspasóz máslıhatynda. Budan bólek, memlekettik qyzmetkerlerdiń rotatsııasyna qatysty talaptardyń saqtalmaıtyny anyqtaldy. Máselen, birqatar aımaqtarda keıbir memlekettik qyzmetkerler bir orynda 10 jyldan astam ýaqyt otyr. Búginde olardyń rotatsııasyn ótkizýge tapsyrma berildi. 

Onyń aıtýynsha, test kezinde memlekettik qyzmetkerlerdiń jeke qarym-qabiletteri baǵalansa, suhbattasý barysynda olardyń biliktiligi ǵana emes, memlekettik saıasaty túsindirý ári halyqqa jetkize bilý deńgeıi baǵalandy.

Attestatsııanyń qorytyndysy boıynsha  QR Prezıdenti janyndaǵy Joǵary attestatsııalyq komıssııa 36 adamdy qyzmeti jaǵynan tómendetý týraly keńes berdi. Olardyń ishinde jalǵan qujattarmen júrgen memqyzmetkerler de bar.  Al tekseristen ótken memlekettik qyzmetkerlerdiń 11 paıyzyn, ıaǵnı 130 adamdy qyzmeti jaǵynan kóterý usynyldy.