Memlekettik qyzmetke turýdyń formaty ózgeredi

ASTANA. QazAqparat – Búgin elordada Memlekettik qyzmet isteri agenttiginiń bastamasymen jáne Astana memlekettik qyzmet habynyń qoldaýymen «Memlekettik qyzmettegi HR: personaldy strategııalyq basqarýǵa kóshý» forýmy bastaldy, dep habarlaıdy QazAqparat tilshisi.

Agenttik tóraǵasy Darhan Jazyqbaev óz sózinde Qazaqstanda júrgizilip jatqan saıası reformalar aıasynda memlekettik qyzmet júıesine jańa talaptar júktelgenin atap ótti.

«Agenttik memlekettik qyzmetke EYUD elderinde keńinen koldanylatyn HR-quraldaryn engizý boıynsha is-sharalardy pysyqtap jatyr. Biz úshin HR salasyndaǵy jańa tájirıbeni jınaqtaý, sondaı-aq memlekettik qyzmetke bilikti mamandardy tartý óte mańyzdy. Ashyq, ádil sheshimder qabyldaı alatyn, belsendi, zamanaýı talaptarǵa ıkemdi memlekettik apparatty qalyptastyrýda adam kapıtalyna den qoıýdyń mańyzy zor», – dedi D. Jazyqbaev.

«Memlekettik qyzmet isteri agenttigimen memlekettik qyzmetke ornalasý konkýrstarynyń ádildigin qamtamasyz etý úshin «E-qyzmet» aqparattyq júıesiniń syrtqy portalynda memlekettik qyzmetke jańa irikteý algorıtmi ázirlenip, konkýrstyq rásimdi ótkizý formaty qaıta qaraldy. Konkýrstyq rásimniń jańa formaty úmitkerlerge aldyn ala belgilengen ýaqytta ótetin áńgimelesýden basqa, barlyq kezeńderde kez kelgen ýaqytta jáne álemniń kez kelgen jerinen konkýrsqa qatysýǵa múmkindik beredi», – dedi agenttik tóraǵasy.

Testileýden ótý qaǵıdalaryn saqtaý Prezıdenttik jastar kadr rezervine irikteý barysynda qoldanylyp, tıimdiligin kórsetken proktorıng júıesi arqyly qamtamasyz etilmek.

Onyń aıtýynsha, ázirlengen irikteý algorıtmi zańnamany bilýge arnalǵan 4 normatıvtik-quqyqtyq akti boıynsha testileýdi (Konstıtýtsııa, Memlekettik qyzmet jáne Sybaılas jemqorlyqqa qarsy is-qımyl týraly zańdary, Ádep kodeksi), qabilettilik pen quzyrettilikti testileýdi (IQ, EQ, SQ testileý), basshylyq laýazymdar úshin esse jazýdy qamtıdy. Sonymen qatar, salalyq jáne táýelsiz sarapshylardan, HR mamandar, ádep jónindegi ýákilderden turatyn konkýrstyq komıssııamen áńgimelesý tártibi eskerilgen.

Darhan Jazyqbaevtyń sózine qaraǵanda irikteýdiń bul tásilderin 2023 jyly «E-qyzmet» aqparattyq júıesinde pılottyq aprobatsııadan ótkizý josparlanyp otyr.

Forýmǵa elimizdiń jáne sheteldiń ǵalymdary, memlekettik organdar ókilderi, HR salasyndaǵy sarapshylar qatysyp jatyr. Jıynda delegattar memlekettik qyzmetti damytýdaǵy tájirıbelerimen bólisti.