Memlekettik qyzmetke kir keltirgender mindetti túrde jaýapqa tartylady

NUR-SULTAN. QazAqparat – Jekelegen saıası laýazymdarǵa biliktilik talaptaryn belgilenbek. Bul týraly Parlament Májilisiniń jalpy otyrysynda memlekettik qyzmet máseleleri zań jobasyn talqylaý kezinde QR Memlekettik qyzmet isteri agenttiginiń tóraǵasy Anar Jaıylǵanova málim etti, dep habarlaıdy QazAqparat tilshisi.

«Sybaılas jemqorlyq quqyq buzýshylyq nemese memlekettik qyzmetke kir keltiretin tártiptik teris qylyq jasaǵany úshin jaýapkershiligi qaralatyn adamdardy basqa memlekettik qyzmetke aýysýyna baılanysty jumystan bosatýǵa tyıym salý usynylady. Osyndaı shekteýler quqyq buzýshylyq jasaǵan adamdardy jaýpkershilikten bosatýdyń jolyn kesý úshin qoldanystaǵy zańda óz erki boıynsha jumystan bosatýǵa da qarastyrylǵan», - dedi Jaıylǵanova.

Budan bólek ol jekelegen saıası laýazymdarǵa Prezıdenttiń sheshimi boıynsha biliktilik talaptaryn belgileý usynylyp otyrǵandyǵyn atap ótti.

«Qazirgi ýaqytta saıası laýazymdarǵa biliktilik talaptar belgilenbeıdi. Osyǵan baılanysty jetkilikti jumys tájirıbesi joq adam bos laýazymǵa ornalasýy múmkin. Bul túzetýler Prezıdent Ákimshiliginiń 2019 jylǵy 13 qazandaǵy tapsyrmasyn oryndaý úshin ázirlendi», - dep naqtylady agenttik basshysy.

Budan buryn habarlanǵandaı, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Sondaı-aq zań jobasynda «Dıplommen aýylǵa» jobasyn memlekettik qyzmetshilerge qoldaný eskerilgen.