Memlekettik qyzmet salasyn jetildirý úshin 70-ten asa arnaıy zertteý júrgizdik – Álıhan Báımenov

ASTANA. QazAqparat – Memlekettik qyzmet salasyn jetildirý úshin 70-ten asa arnaıy zertteý júrgizilgen. Bul týraly sheteldik sarapshylardyń qatysýmen elordada ótip jatqan «Memlekettik qyzmettiń úsh taǵany: Merıtokratııa. Adaldyq. Innovatsııalar» konferentsııasynda Astana memlekettik qyzmet habynyń basshysy Álıhan Báımenov aıtty, dep habarlaıdy QazAqparat tilshisi.

«Astana memlekettik qyzmet haby halyqaralyq deńgeıde tájirıbe jáne bilim almasý ortalyǵyna aınaldy. Ol basynda aımaqtyq dep qurylǵanymen, qazir jahandyq ortalyq retinde tanymal. Biz 70-ten asa arnaıy zertteýler júrgizdik. Endi solar Úkimetke memlekettik qyzmet salasyndaǵy túrli máselelerdi sheshýge kómektesedi dep senemiz. Memlekettik qyzmetti jetildirýdegi problemalar tek Qazaqstanda ǵana emes, barlyq elde bar», - dedi Álıhan Báımenov.

Onyń aıtýynsha, ásirese pandemııa kezinde memlekettik qyzmet jetildirýdi talap etetini aıqyn kórindi.

«Bul ýaqytta qarapaıym halyq Úkimetten júıeli, ádil ári batyl sheshimder qabyldaýdy surady. Sondyqtan Úkimetke osy salany damyta túsý qajet boldy. Bul oraıda halyqaralyq tájirıbeni basshylyqqa alamyz. Ózge elderde bar júıelerdi, sheshimderdi ózimizdiń elimizdiń múmkindigin eskere otyryp, engizýge tyrysamyn. Ol úshin Astana memlekettik qyzmet haby sheteldik tájirıbege zertteý jasap, usynystar ázirleıdi», - dep túsindirdi Álıhan Báımenov.

Atalǵan saladaǵy máselelerdi talqylap, ony sheshý joldaryn usynýǵa arnalǵan konferentsııaǵa 30 elden sarapshylar jınaldy. Olar 19 mamyrǵa deıin memlekettik qyzmetti jahandyq tendentsııalarǵa saı únemi damytý týraly oılaryn ortaǵa salmaq.