Memlekettik qyzmet kórsetýde sáıkessizdikter jıi oryn alady
«Memlekettik qyzmet kórsetý tártibi standarttar jáne reglamenttermen qosa, salalyq zańdarmen jáne qaǵıdalarmen retteledi. Biraq olardyń arasynda kóp sáıkessizdikter bar. Bul qyzmet alýshylarǵa qıyndyq týǵyzady», - dedi Kórsetiletin memlekettik qyzmetter departamentiniń dırektory Ildar Úısimbaev.
Ústimizdegi jyly agenttik 182 sáıkessizdik faktisin anyqtady, onyń 145-i joıylyp, 37-si pysyqtalýda. Sáıkessizdikter kelesi mınıstrlikterde jıi oryn alatyn bolyp shyqty: Aýyl sharýashylyǵy mınıstrligi - 18, Investıtsııalar jáne damý mınıstrligi - 8, Eńbek jáne áleýmettik qorǵaý mınıstrligi - 4, Іshki ister mınıstrligi - 3, Bilim jáne ǵylym mınıstrligi - 2, Ulttyq ekonomıka mınıstrligi - 1, Qorǵanys mınıstrligi - 1.
«Osyndaı sáıkessizdikterdiń sebepterin joıý maqsatynda Agenttik salalyq zańdar negizinde standarttar jáne reglamentterdi qabyldaýdy alyp tastaı otyryp, ár qyzmet boıynsha tek bir normatıvti akt bekitýdi usyndy. Bul qyzmet kórsetýshiler men qyzmet alýshylardyń aqparatty qabyldaýyn jeńildete túsedi. Búgingi tańda osy usynys Prezıdent ákimshiligi men Úkimette qoldaý tapty jáne zańnamaǵa túzetý engizý boıynsha jumystar júrgizilip jatyr», - dedi departament dırektory Ildar Úısimbaev.
Sonymen qatar, departament dırektory «jasyryn» memlekettik qyzmetterdi anyqtaý jumystaryna da toqtaldy.
«Agenttik 2015-2017 jyldary memlekettik qyzmet belgileri bar, ıaǵnı «jasyryn» qyzmetter dep atalatyn 300-den astam memlekettik fýnktsııalardy anyqtady. Agenttiktiń bastamasymen 77 «jasyryn» qyzmet tizilimge engizildi, bul - tizilimge engizilgen qyzmetterdiń jalpy sanynyń 45%-y», - deıdi Ildar Úısimbaev.
Departament basshysynyń aıtýynsha, «jasyryn» qyzmetter tiziminde top bastap turǵan - jer ýchaskesine menshik quqyǵyn alý, jer ýchaskelerin satyp alý-satý kelisimshartyna otyrý úshin qujattar qabyldaý, jer ýchaskesin jalǵa berý, jer ýchaskelerin bızneske berý, AÓK sýbektilerin sýbsıdııalaý, jumyskerlerdiń ómirine jáne densaýlyǵyna kelgen zardapty óteý boıynsha áleýmettik kómek kórsetý, energetıka salasynda birqatar ruqsattar berý, azamattarǵa turǵyn úıiniń apatty bolýy týraly anyqtama berý jáne taǵy basqalar.