Memlekettik qyzmet isteri agenttigi kadrlardy ońtaılandyrady

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginde kadrlardy ońtaılandyrý protsesi júredi, dep habarlaıdy QazAqparat tilshisi agenttik tóraǵasy Alık Shpekbaevqa silteme jasap.

Astanada ótip jatqan memlekettik qyzmetti jetildirýge arnalǵan halyqaralyq konferentsııada Alık Shpekbaev agenttikte Kadrlyq is-qaǵazdaryn júrgizý jáne eńbekaqyny tóleý boıynsha qyzmet kórsetý ortalyǵy ashylǵanyn atap ótti.

"Kadrlyq is-qaǵazdaryn júrgizý jáne eńbekaqyny tóleý boıynsha qyzmet kórsetý ortalyǵyn iske qosýda ońtaılandyrý jumystary júredi. 50 memlekettik qyzmetshini qysqartý arqyly agenttikte jylyna 180 mıllıon teńgeni únemdeýge bolady. Aprobatsııa sátti júzege asqan jaǵdaıda jobany barlyq memlekettik apparat aıasynda iske qosamyz. Aldyn ala esepteýler boıynsha, ońtaılandyrý 4600 qyzmetkerdi qamtıdy jáne jylyna 5,5 mlrd teńgeni únemdeýge bolady", - dedi Shpekbaev.  

Onyń aıtýynsha, agenttik ortalyq apparattaǵy shtat sanynyń úshten bir bóligin qysqartyp, qyzmetkerler jalaqysyn 60%-ǵa deıin kóbeıtken.

Ońtaılandyrý nátıjesinde irikteýdegi básekelestik arta túsken.

«Pılottyq organdarda ótken jyly bir orynǵa 2 úmitker kelgen edi. Al bıyl bir orynǵa - 50-den astam úmitker talasýda", - dedi Shpekbaev.

Buǵan deıin Alık Shpekbaev 2019 jyldan bastap, memlekettik qyzmetshilerdiń jalaqysy jańa júıemen tólenetinin, eńbekaqynyń edáýir ulǵaıatynyn habarlaǵan edi.

Sondaı-aq, Qazaqstannyń memlekettik qyzmetshilerine baspana alýda, zeınetaqy taǵaıyndaýda, balabaqshadan oryn alýda jáne óńirlerdegi saýyqtyrýda jeńildikter berý sharalary ázirlenip jatyr.