Memlekettik qyzmet degenimiz – jeke bastyń baq-dáýletin arttyratyn jer emes – Prezıdent

NUR-SULTAN. QazAqparat – Basqarý júıesiniń tıimdiligi jumystyń barysymen emes, túpki nátıjemen ólshenetin bolady. Bul týraly Prezıdent Qasym-Jomart Toqaev referendým qorytyndysyna qatysty Qazaqstan halqyna úndeýi barysynda málim etti, dep habarlaıdy QazAqparat tilshisi.

«Memlekettik apparatty jańǵyrtyp, bıýrokratııadan barynsha aryltý úshin júıeli jumys jalǵasady. Biz qoǵamnyń barlyq ókilderiniń talap-tilekterine jaýap beretin ozyq memleket qurýymyz kerek. Basqarý júıesiniń tıimdiligi jumystyń barysymen emes, túpki nátıjemen ólshenetin bolady. Memlekettik apparat bıznespen, úkimettik emes uıymdarmen jáne azamattarmen tyǵyz jumys isteýge basa nazar aýdarýǵa tıis. Sol arqyly el múddesine saı tıimdi sheshimder qabyldanyp, halyqqa kórsetiletin qyzmet sapasy jaqsara túsedi», - dedi Qasym-Jomart Toqaev.

Prezıdent memlekettik qyzmetkerler barynsha ashyq jumys júrgizip, halyqqa shynaıy esep berýi kerek ekenin qadap aıtty.

«Memlekettik qyzmet degenimiz – jeke bastyń baq-dáýletin arttyratyn jer emes. Bul – týǵan halqyńnyń aldynda aıryqsha jaýapkershilik arqalaý degen sóz», - dedi Memleket basshysy.