Memlekettik qyzmet alýda aıyppul kedergi bolmaýy kerek - agenttik

ASTANA. QazAqparat – Memlekettik qyzmet isteri agenttigi tóraǵasynyń orynbasary Salaýat Múksimov aıyppuly bar adamdardyń memlekettik qyzmet alý máselesin kóterdi, dep habarlaıdy QazAqparat tilshisi.

«Búginde memlekettik qyzmetterdi qıyndyq, kedergisiz rásimdeý jaǵy, ıaǵnı qyzmet kórsetýden formaldy túrde bas tartpaý qarastyrylyp jatyr. Ózderińiz biletindeı, memlekettik qyzmet alý týraly ótinish durys toltyrylmasa, mazmuny talapqa sáıkes kelmese nemese ótinishpen qosa tıisti qujattar usynylmasa qyzmet kórsetýden bas tartylady. Jańa mehanızm formaldy negizderge súıene otyryp memlekettik qyzmet kórsetýden bas tartpaı, kerisinshe tıisti konsýltatsııalyq kómek kórsetýdi kózdeıdi», - dedi Salaýat Múksimov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, memlekettik qyzmetterdi alýda kedergi bolmaýy tıis.

«Demek, memlekettik qyzmet alýshynyń buǵan deıin tólemeı kelgen ákimshilik aıyppuly kóligin rásimdeýde nemese jeke kýálik aýystyrýyna kedergi keltirmeýi tıis. Búginde aıyppuldy tólemeıinshe memleketttik qyzmet kórsetilmeıdi. Osy jerde aıyppul kedergi bolmaýy kerek», - deıdi ol.

Buǵan deıin habarlaǵanymyzdaı, memlekettik qyzmetshilerdi artyq jumsaǵan laýazymdy tulǵa 40 AEK aıyppul arqalaıdy.