Memlekettik qurylymdarda tek otandyq telearnalar kórsetiledi

ASTANA. QazAqparat - QR Aqparat jáne kommýnıkatsııalar mınıstri Dáýren Abaev otandyq telearnalar salasynda usynylyp otyrǵan túzetýler jaıynda aıtyp berdi, dep habarlaıdy QazAqparat.

«Jarnama da nazardan tys qalmady. Búginde zańmen qazaq tilinde habar taratýdyń eń tómengi úlesi belgilengen. Onyń kólemi efır ýaqytynyń 50 paıyzyn quraıdy. Endi bul norma jarnamaǵa da taralady. Sonymen qatar atalǵan talapty árbir efır saǵatynyń bóligine bekitý ıdeıasyn alǵa tartyp otyrmyz»,-dedi mınıstr Facebook-te jarııalanǵan vıdeoda.

Munymen qosa ol otandyq telearnany damytý maqsatynda memlekettik mekemelerde jappaı kórsetilim úshin  tek qazaqstandyq telearnalar men radıoarnalardy taratý turǵysyndaǵy túzetý engizilgenin jetkizdi.

«Aldaǵy ýaqytta osyndaı ereje áýejaılar men vokzaldarǵa da taralýy múmkin»,-dedi vedomstvo basshysy.

Budan bólek, múmkindigi shekteýli jandardyń aqparatqa qoljetimdigin jeńildetý úshin sýrdoaýdarma men sýbtıtrleýdi qoldaný aıasy keńeıtiledi.

«Endi barlyq telearnalarda jańalyqtar kúnine bir retten kem emes kólemde sýrdoaýdarma nemese sýbtıtrleýdi paıdalaný múmkindigimen shyǵýy tıis. Buǵan qosa, adamdar jańalyqty qaraýǵa nazar aýdaratyn ýaqyttarda, ıaǵnı saǵat 18:00-den 22:00 aralyǵynda qamtylýy kerek»,- dep túsindirdi Dáýren Abaev.