Memlekettik qoldaý bir aýyldy túletti
Soltústik Qazaqstan oblysynyń Taıynsha aýdanynda ornalasqan «Donetskoe - Nurly Jol» jaýapkershiligi shekteýli seriktestigi bar. Ol oblys ortalyǵynan 200 shaqyrym jerde ornalasqan. Belgili bir sebeptermen Donetskoe aýylynyń tirshiligi turalap, berekesi kete bastaǵanda isker azamattar qol biriktirip, eldi mekenniń tamyryna qan júgirtken.
- «Men ómir boıy egin egip, jermen jumys istep kelemin. Eki jyl buryn Donetskoe aýylyndaǵy ferma jabylyp, sol jerdegi azamattar jumyssyz qalatyn boldy. Ákimdiktiń ótinishi boıynsha men qalǵan dúnıeni saqtap qalýǵa bel baıladym», - deıdi «Donetskoe - Nurly Jol» JShS dırektory Sáken Nurǵalıev.
2017 jyly fermer S.Nurǵalıev óziniń dosymen eki sharýashylyqty biriktirip, seriktestik qurady. Sondaǵy bazany, qoımany, qyrmandy satyp alady. Odan keıin asyl tuqymdy iri qara mal satyp alýdyń joldaryn izdeıdi. Mal sanyn kóbeıtip, sharýashylyqty keńeıtip, aýyldy qaıta qalpyna keltirýge, azamattarǵa jumys taýyp berýge bar kúsh-jigerlerin jumsaıdy.
Ótken jyly Aýyl sharýashylyǵyn qarjylaı qoldaý qorynan «Sybaǵa» baǵdarlamasy arqyly 40 mln teńge nesıege qol jetkizip, oǵan chehııalyq «Agro Royal» kompanııasynan 60 bas sımmental tuqymdy taıynshalar satyp ákeldi.
Sondaı-aq, seriktestik Qordyń «Yrys» baǵdarlamasy arqyly sharýashylyǵyn keńeıtken. Alǵan 79 mln teńge nesıege Slovakııadaǵy «Sevita» kompanııasymen kelisimshartqa otyrý arqyly sımmental tuqymdy maldyń ekinshi partııasyn jetkizgen. Endi Belarýs 921 traktoryn, júk tıegish jáne basqa da sharýashylyqqa qajetti qural-jabdyqtar satyp alýdy josparlap otyr.
- Biz jalaqy boıynsha qaryz bolyp júrgen 10 jumysshynyń eńbekaqysyn tóleýge jáne jańa jumys oryndaryn ashýǵa múmkindik aldyq. Búgingi tańda fermada 28 adam jumys isteıdi jáne olar laıyqty eńbekaqylaryn alyp otyr,- deıdi Sáken Nurǵalıev.
Alǵan nesıeleri iri qara mal basyn 250-den 600 basqa deıin kóbeıtýge múmkindik berdi. Onyń ishinde 110 bas asyl tuqymdy sıyrlary bar. Bıyl kúzde Slovakııadan taǵy 100 bas iri qara ákelmek.
Asyl tuqymdy sıyrlardyń bir jarym aılyq buzaýy kólemi jaǵynan jergilikti jarty jyldyq buzaýdan úlken bolady. Asyl tuqymdy malmen jumys istegenderdiń tabysy artyq. Mysaly, jergilikti sıyrlardan saýynshylar 100 myń teńge tapsa, syrttan kelgen asyl tuqymdy sıyrdy saýatyndardyń eńbegi shamamen 150 myń teńgege jetedi.
Búgingi kúni Donetskoe aýylynda bes júzge jýyq adam turady. Olarǵa osy sharýashylyq jáne onyń basshylyǵy úlken kómek kórsetip otyr. Óıtkeni, aýylda jumys bar, tabys bar. Erinbeı eńbek etken adamnyń turmysy da jaqsy. Seriktestik aýyldan qudyq qazyp, ǵımarattar salyp, joldardy jóndep jatyr. Onyń syrtynda aýyl mektebine de kómektesedi.
Sońǵy úsh jylda Aýyl sharýashylyǵyn qarjylaı qoldaý qory bul aımaqqa etti jáne sútti baǵyttaǵy mal basyn kóbeıtý úshin 1,4 mlrd teńge qarjy bóldi. Sonyń nátıjesinde 2,3 myń bas iri qara satyp alynǵan. Etti jáne sútti baǵyttaǵy mal basyn arttyrýǵa nesıe berý jumystary jalǵasýda.