Memlekettik kirister komıtetiniń jumys ýaqyty keshki segizge deıin uzartyldy

ASTANA. QazAqparat - QR Qarjy mınıstrliginiń Memlekettik kirister komıteti salyq bereshegi bar jeke tulǵalar bilýi kerek málimettermen bólisti, dep habarlaıdy QazAqparat.

QR QM Memlekettik kirister komıteti áleýmettik jelide jáne messendjerlerde taralǵan «salyq bereshegi bar jeke tulǵalarǵa 1 qazannan bastap bank qyzmetteri kórsetilmeıtini» jónindegi aqparatty joqqa shyǵardy.

«Jeke tulǵalardyń 2017 jyldyń múlik jáne jer salyqtary boıynsha mindettemeleriniń  tóleý merzimi  2018 jyldyń 1 qazanynda aıaqtalady.

Joǵaryda kórsetilgen merzimde salyqty tólemegen jaǵdaıda, jeke tulǵada bereshek paıda bolady, ol somaǵa kúnde ósimpul esepteledi», dep túsindiredi komıtet.

Bankter salyqtyq bereshegi, áleýmettik tólemder boıynsha bereshegi bar salyq tóleýshige (zańdy tulǵalarǵa da, dara kásipkerlerge de, jeke tulǵalarǵa da) banktik shotty ashýdan bas tartatyn quqyǵy joq.

«Salyq kodeksine sáıkes salyqtyq bereshegi, áleýmettik tólemder boıynsha bereshegi bar tulǵalarǵa basqa banktik qyzmetterdi kórsetýden bas tartý qarastyrylmaǵan», - delingen habarlamada.

Aıta keterligi, salyq tóleýshiler komıtettiń saıtynan bereshegi bar/joq ekendigin onlaın rejimde teksere alady. 

Qazir memlekettik kirister organdaryna salyq tóleýshilerdiń kóp kelýine baılanysty qyzmet kórsetý ortalyqtarynyń jumys ýaqyty saǵat 20.00-ge deıin uzartyldy, sondaı-aq qyzmet kórsetýge qosymsha qyzmetkerler bólingen.