Memlekettik kirister komıtetiniń resmı ókili taǵaıyndaldy

Búgin QR Qarjy mınıstrliginiń Memlekettik kirister komıtetiniń tóraǵasy Dáýlet Erǵojın memlekettik kirister organdarynyń aýmaqtyq bólimshelerimen bolǵan keńeste komıtettiń jańa resmı ókili - Murat Jumanbaıdy tanystyrdy, dep habarlaıdy vedomstvonyń baspasóz qyzmeti.

D.Erǵojın Memlekettik kirister komıteti jumysynyń alǵashqy kúninen bastap, azamattar men buqaralyq aqparat quraldaryna qoljetimdi jáne ashyq memlekettik organ sıpatyn qalyptastyrǵandyǵyn atap ótti. Barlyq mańyzdy sheshimder men Komıtettiń bastamashylyǵymen zańnamaǵa engizilgen ózgerister árqashan keńinen túsindirilip, jurtshylyqqa jetkizilýi kerek.

Ol memlekettiń fıskaldy saıasaty men kóleńkeli ekonomıkaǵa qarsy is-qımyldy túsindirýdi odan ári kúsheıtý maqsatynda komıtette Qoǵammen baılanys basqarmasynyń qurylyp, onyń basshysy bolyp Murat Jumanbaı taǵaıyndalǵandyǵyn habarlady.

Erǵojın Jumanbaıdyń vedomstvanyń resmı ókili retinde Memlekettik kirister komıtetiniń jumysy týraly halyqty nátıjeli habardar etetindigine senim bildirdi.

Óz kezeginde Jumanbaı komıtettiń basshylyǵy men ujymyna ózine senim artqandary úshin alǵysyn bildirip, belgilengen mindetterdi tıimdi iske asyrýǵa barlyq kúsh-jigerin jumsaıtyndyǵyn jetkizdi.

M.Jumanbaı bes jyldan asa Sybaılas jemqorlyq jáne ekonomıkalyq qylmysqa qarsy kúres agenttiginiń resmı ókili bolyp, onyń baspasóz ortalyǵyna jetekshilik etti. Eki jyldaı Qazaqstan Respýblıkasy Parlamenti Májilisi tóraǵasynyń keńesshisi bola tura, palatanyń baspasóz qyzmetin basqardy.