Memlekettik kirister komıteti salyq jeńildikteriniń tizimin jarııalady

ASTANA. QazAqparat - 2022 jylǵy 21 jeltoqsanda Salyq kodeksine engizilgen ózgeristerde jeke tabys salyǵy boıynsha jeńildikter tizimi keńeıtildi, dep habarlaıdy QazAqparat Memlekettik kirister komıtetine silteme jasap.

Jeke tulǵanyń kirisi retinde qarastyrylmaıdy:

- ujymdyq, eńbek sharttarynda jáne (nemese) jumys berýshiniń aktisinde belgilengen normalar qyzmetkerlerge olardyń jumysy jolda ótetin, jol júrý sıpatyndaǵy, qyzmet kórsetiletin ýchaskeler sheginde qyzmettik saparlarmen baılanysty bolǵan jaǵdaılarda ótemaqy tólemderi (01.01.2018 j. bastap retrospektıvti qoldanysqa engiziledi);

- formaly kıim kııý jáne (nemese) ony qamtamasyz etý jónindegi mindet belgilengen jaǵdaılarda qyzmetkerge berilgen formaly kıimniń quny (01.01.2023 j. qoldanysqa engiziledi);

- tólem kartochkalaryn paıdalana otyryp tólemderdi qabyldaýǵa arnalǵan baqylaý-kassa mashınasyn jáne jabdyqty (qurylǵyny) qoldanýdy buzý faktileri týraly habarlaǵan adamnyń fakt rastalǵan jaǵdaıda alatyn syıaqy somasy (01.01.2023 j. bastap qoldanysqa engiziledi.)

Kiristi túzetý kelesi kirister boıynsha júzege asyrylady:

- ashyq jáne aralyq ınvestıtsııalyq paı qorlarynyń paılaryn ótkizý kezinde qun ósiminen túsetin tabystar (1.01.2022 j. bastap qoldanysqa engiziledi);

- jeke turǵyn úı qoryndaǵy jalǵa alynǵan turǵyn úıge aqy tóleý úshin bıýdjet qarajatynan sýbsıdııalar túrindegi tabystar (1.01.2022 jyldan bastap qoldanysqa engiziledi);

- teńgede ornalastyrylǵan jeke tulǵalardyń depozıtteri boıynsha ótemaqy (syılyqaqy) (2023 jylǵy 1 qańtardan bastap 2025 jylǵy 1 qańtarǵa deıin qoldanylady).

Múliktik kiristi anyqtaý maqsatynda:

- menshik quqyǵy paıda bolǵan sátten bastap bir jyldan az ýaqyt menshik quqyǵynda bolǵan turaq oryndaryn satý kezinde múliktik tabys paıda bolady (1.01.2022 jyldan bastap qoldanysqa engiziledi);

- erli-zaıyptylardyń bireýiniń jyljymaıtyn múlikke quqyqtaryn muragerlikke alý kezinde qunnyń ósýin aıqyndaý maqsatynda menshik quqyǵynda bolý erli zaıyptylardyń osyndaı múlikke ortaq birlesken menshik quqyǵy tirkelgen kúnnen bastap aıqyndalýy qarastyrylady (1.01.2023 jyldan bastap qoldanysqa engiziledi).

1.01.2023 jyldan bastap, eger tsıfrlyq aktıvterdi satý kezinde qun ósiminen túsetin kiris paıda bolsa, ondaı mundaı kiris jeke tabys salyǵymen salyqtandyrylady. Atalǵan norma buryn bolmaǵan.