Memlekettik kirister komıteti Qyrǵyzstan júk kólikteri ne úshin tekseretinin túsindirdi
«Jyl basynan beri Qyrǵyz Respýblıkasynan Qazaqstan Respýblıkasyna qytaılyq óndiristiń halyq tutynatyn taýarlary ımportynyń 4 ese ósýi baıqaldy. Táýekelderdi basqarý júıesi negizinde júrgiziletin taqyryptyq salyqtyq tekserýler aıasynda taýarǵa ilespe qujattarda kórsetilmegen, negizinen Qytaı óndirisindegi, qymbat jáne salyqty kóp qajet etetin taýarlar anyqtalady (onyń ishinde tańbalanbaǵan tondar, elektrondyq sıgaretter, brendtik taýarlar jáne t.b.)», - delingen komıtet málimetinde.
Taqyryptyq salyqtyq tekserýler Qazaqstan Respýblıkasynyń aýmaǵynda arnaıy bólingen oryndarda júrgiziletinin, shekarada tekserý is-sharalary júzege asyrylmaıtynyn atap ótý qajet. 2022 jyldyń 15-16 aqpanynda Almaty qalasynda ótken Qazaqstan Respýblıkasy men Qyrǵyz Respýblıkasynyń saýda yntymaqtastyǵy jónindegi jumys tobynyń otyrysynda júrgizilgen tekserýler sanyn qysqartý máselesi talqylandy, birqatar ýaǵdalastyqtarǵa qol jetkizildi.
«Atap aıtqanda, Qyrǵyz Respýblıkasynyń Qarjy mınıstrligi janyndaǵy Memlekettik salyq qyzmeti 16 aqpannan bastap eksporttaýshylarda EAEO elderine eksporttaý kezinde tasymaldanatyn taýarǵa elektrondyq shot-faktýralardyń (EShF) bolýyn qamtamasyz etý boıynsha mindettemelerdi ózine aldy. Tasymaldanatyn taýarǵa EShF bolǵan jaǵdaıda Qazaqstan Respýblıkasynyń Memlekettik kiris organdary baqylaý is-sharalaryn ótkizbeıdi. Óz kezeginde, kezdesý barysynda taraptar taýarlardy eksporttaý kezinde EShF bolmaýy eksporttaýshynyń salyq tóleýden jaltarý maqsatynda satý faktisin jasyrý nıetin bildiredi, bul eki eldiń bıýdjetterine nuqsan keltiredi, sondaı-aq adal kásipkerler men óndirýshilerdi teń emes básekelestik jaǵdaılarǵa qoıady degen ortaq pikirge keldi. Osyǵan baılanysty qyrǵyz eksporttaýshylarynda EShF bolmaǵan jaǵdaıda taqyryptyq salyqtyq tekserýler júrgizý qajettigi týraly sheshim qabyldandy», - dep atalyp ótken habarlamada.
Sonymen qatar, komıtet aqparatynda qyrǵyz tarapy qol jetkizilgen ýaǵdalastyqty oryndamaǵany atap ótilgen.
Máselen, 16-18 aqpan aralyǵynda Qyrǵyz Respýblıkasynan halyq tutynatyn taýarlary bar 223 júk avtokólik quraly júrip ótti, bul rette tekserý júrgizbeı júrý marshrýty boıynsha ótken 1 ǵana avtokólik qural boıynsha EShF usynylǵan. 222 avtokólik quraly boıynsha EShF berilmegen, osyǵan baılanysty olarǵa qatysty taqyryptyq salyqtyq tekserýler júrgiziledi.
«Qyrǵyz tarapynyń qol jetkizilgen ýaǵdalastyqtardy saqtamaý faktisi boıynsha Memlekettik kirister komıteti qyrǵyz áriptesterine qyrǵyz eksporttaýshylarynda EShF bar bolýyn baqylaýdy kúsheıtý qajettiligi jáne qol jetkizilgen ýaǵdalastyqtardy oryndaý qajettiligi týraly hat joldady, bul júrgiziletin tekserýler sanyn qysqartýǵa múmkindik beredi. Óz tarapynan, tekserý júrgizýge qalyptasqan kezekti qysqartý maqsatynda Memlekettik kirister organdarynyń qyzmetkerleri kúsheıtilgen rejımge kóshirildi – tekserýler sany ortasha eseppen kúnine 10 avtokólik quraldarynan 30-ǵa deıin kóbeıtildi», - dep naqtylandy vedomstvo.
Aıta ketý kerek, buǵan deıin BAQ-tarda Qazaqstan-Qyrǵyz shekarasynda júk avtokólik quraldarynyń jınalýy týraly materıal jarııalanǵan bolatyn.
Óz kezeginde, Memlekettik kirister komıteti jarııalanǵan beınematerıaldarda, shekarany kesip ótýge kedergi keltirmeıtin, Qordaı aýylynda ornalasqan taqyryptyq salyqtyq tekserýler júrgizý oryndarynan kadrlar kórsetildi dep habarlaıdy.
Qazirgi ýaqytta tikeleı eki el shekarasynda júk avtokólikteriniń jınaqtalýy oqıǵasy joq